Reseı Qazaqstanda 3 JEO salady: Kelisim jobasy kópshilik talqysyna shyǵaryldy

Ashyq normatıvtik-quqyqtyq aktiler portalynda Qazaqstan men Reseı úkimeti arasyndaǵy Kókshetaý, Semeı jáne Óskemen qalalarynda kómir jylý elektr ortalyqtaryn salý jobalary týraly kelisim jobasy jarııa talqyǵa shyǵaryldy, dep habarlaıdy Kazinform.

Qujatta Energetıka mınıstri Almasadam Sátqalıevke Qazaqstan Úkimeti atynan qos eldiń úkimeti arasyndaǵy qaǵıdalyq sıpaty joq ózgerister men tolyqtyrýlar engizýge ruqsat bere otyryp, Qazaqstan aýmaǵyndaǵy Kókshetaý, Semeı jáne Óskemen qalalarynda kómir jylý elektr ortalyqtaryn salý jobalary boıynsha kelisimge qol qoıýǵa ókilettik beriletini aıtylady. 

Jobalardy iske asyrýǵa Qazaqstan tarapynan tapsyrys berýshiniń fýnktsııalaryn júzege asyratyn — «Samuryq-Energo» aktsıonerlik qoǵamy, al Reseı tarapynan bas merdigerdiń fýnktsııalaryn júzege asyratyn — «Inter RAO» kompanııalar tobyna kiretin jáne óziniń qosalqy merdigeri retinde tıisti uıymdardy tartýǵa quqyly «Inter RAO — Eksport» JShS jaýapty.

Jobalardy iske asyrý maqsatynda «INTER RAO — Eksport» JShS kelisimsharttar boıynsha merdigerdiń fýnktsııalaryn oryndaý úshin mamandandyrylǵan jobalaý kompanııasyn qurýǵa quqyly.

Al «Samuryq-Energo» aktsıonerlik qoǵamy kelisimsharttar boıynsha tapsyrys berýshiniń fýnktsııalaryn oryndaý úshin «Samuryq-Energo» aktsıonerlik qoǵamyna qatysty úlestes kompanııa bolyp tabylatyn mamandandyrylǵan jobalaý kompanııasyn qurýǵa quqyǵy bar.

Eske sala keteıik, buǵan deıin Almasadam Sátqalıev 3 JEO salýda tańdaý nelikten Reseıge túskenin túsindirgen edi.