Reseı Qazaqstan stýdentterine beriletin stıpendııa kvotasyn 100 orynǵa ulǵaıtqan
ASTANA. KAZINFORM – Reseı Federatsııasynyń Premer-mınıstri Mıhaıl Mıshýstın Úkimet basshysy Oljas Bektenovpen kezdesýinde eki eldiń mádenı-gýmanıtarlyq saladaǵy yntymaqtastyǵy belsendi damyp kele jatqanyn atap ótti.
- Qazaqstanda Máskeý ýnıversıtetteriniń fılıaldary jumys isteıdi. Reseıde 60 myńǵa jýyq qazaqstandyq stýdent oqıdy. Bıyl Reseı Úkimeti Qazaqstanǵa usynatyn kvotany taǵy 100 orynǵa, ıaǵnı, barlyǵy 800 stıpendııaǵa deıin ulǵaıtty. Biz ony barlyq jaǵynan quptaımyz, - dedi ol.
M.Mıshýstınniń sózinshe, Qazaqstanda orys tilin damytýǵa arnalǵan halyqaralyq uıym jumys isteı bastaıdy.
Ol Qazaqstan Prezıdenti Qasym-Jomart Toqaevtyń bastamasymen qurylǵan.
Osyǵan deıin Oljas Bektenov Reseı kompanııalaryn ınvestıtsııalyq jobalarǵa belsendi atsalysýǵa shaqyrǵan bolatyn.
