Reseı Qazaqstan men Qyrǵyzstannan taýarlardy jeńildetilgen túrde ótkizý ýaqytyn ulǵaıtty
ASTANA. KAZINFORM — Reseı prezıdenti Vladımır Pýtın Qazaqstan men Qyrǵyzstannan Reseıge taýarlardy jeńildetilgen túrde ákelý merzimin 2025 jyldyń 25 jeltoqsanyna deıin uzartý týraly jarlyqqa qol qoıdy.
— Reseı Federatsııasy Prezıdentiniń 2025 jylǵy 24 qazandaǵy «Reseı Federatsııasynyń memlekettik shekarasynyń Reseı-Qazaqstan ýchaskesindegi kedendik retteýdiń erekshelikteri týraly» № 778 Jarlyǵyna… 1-tarmaqtaǵy «2025 jylǵy 10 jeltoqsanǵa deıin» degen sózderdi «2025 jylǵy 25 jeltoqsanǵa deıin qosa alǵanda» degen sózdermen aýystyrý arqyly túzetý engizý, — delingen jarlyqta.
Másele reseılik zańdy tulǵalar úshin Reseı-Qazaqstan shekarasy arqyly avtomobıl kóligimen ákelinetin taýarlarǵa qatysty.
Qujatqa sáıkes, reseılik zańdy tulǵalar mundaı taýarlardy olardyń Eýrazııalyq ekonomıkalyq odaqtyń (EAEO) ónimi retindegi mártebesin rastaıtyn qujattarsyz, sondaı-aq Odaqtyń nemese RF zańnamasynda talap etiletin tańbalaýsyz nemese basqa aqparatsyz ákele alady.
Bul rette belgili bir sharttardyń saqtaýy jaǵdaıynda mundaı ónimderdi ákelý kedendik erejeler men ónimdi tańbalaý talaptaryn buzý bolyp sanalmaıdy.
Mindetti sharttarǵa mynalar kiredi:
- reseılik alýshylardyń taýarlardy tasymaldaý jáne ýaqytsha saqtaýyn qamtamasyz etý;
- ákelý týraly Ónerkásip jáne saýda mınıstrligine habarlaý;
- keıinnen qajetti tańbalaýdy qoldaný.
27 jeltoqsanǵa deıin mundaı taýarlar qoldanystaǵy keden erejelerine sáıkes deklaratsııalanýy tıis. Reseıdiń Ónerkásip jáne saýda mınıstrligi olar týraly aqparatty memlekettik aqparattyq júıege engizýge mindetti.
Buǵan deıin 2026 jyldyń 11 aqpanynan bastap Eýrazııalyq ekonomıkalyq odaq aýmaǵynda navıgatsııalyq plombalardy paıdalana otyryp jóneltilimderdi qadaǵalaý júıesi iske qosylatynyn habarlaǵan bolatynbyz.