Reseı Qazaqstan aýmaǵynda jańa munaı aıdaıtyn stansa salýy múmkin

ASTANA. KAZINFORM — Qazaqstan aýmaǵy arqyly Qytaıǵa eksporttaıtyn munaı kólemin arttyrýdyń tehnıkalyq múmkindikterin saraptaý jumystary aıaqtalýǵa jaqyn. Bul jaıynda Energetıka mınıstri Erlan Aqkenjenov Úkimet úıindegi baspasóz máslıhatynda málim etti.

— Reseı tarapynyń, atap aıtqanda «Transneft» kompanııasynyń Qytaıǵa eksporttaıtyn munaı tranzıtin 2,5 mln tonnaǵa deıin ulǵaıtý jóninde ótinishi boldy. «Transneft» pen «QazTransOıl» bul ótinishtiń tehnıkalyq múmkindigin zerdeleý jumystaryn júrgizip jatyr. Meniń oıymsha, jaqyn arada aıaqtalady. Sodan keıin biz jańa munaı aıdaıtyn stansa salý qajet pe degen suraqqa naqty jaýap tabamyz, — dedi ol.

Sondaı-aq, Reseı surap otyrǵan kólemdi qosymsha stansa salmaı-aq oryndaýǵa bolatynyn qosty. 

Eske salsaq, 20-22 mamyrda Kanadada ótken G7 qarjy mınıstrleriniń otyrysynda Eýroodaq teńiz arqyly tasymaldanatyn reseılik munaıdy satyp alýdyń maksımaldy baǵasyn tómendetýdi usynǵan edi.