Reseı Kaspıı teńizinde birinshi krýızdik baǵytty ashady
ASTANA. KAZINFORM – 2024 jyldyń jazynda Reseı Kaspıı mańy elderimen birlesip Kaspıı teńizi arqyly birinshi baǵdar ashýdy josparlap otyr.Ekonomıkalyq damý mınıstrligi baspasóz qyzmetiniń habarlaýynsha, bul baǵyt «Uly Edil joly» jobasy aıasynda qurylǵan jáne Kaspıı mańyndaǵy barlyq memleketter – Ázerbaıjan, Iran, Qazaqstan, Túrikmenstan jáne Reseıge birden barýdy kózdeıdi.
Reseı Ekonomıkalyq damý mınıstriniń orynbasary Dmıtrıı Volvachtyń aıtýynsha, qazirgi ýaqytta Astrahandaǵy «Lotos» keme jasaıtyn zaýyt aýmaǵynda «Petr Velıkıı» krýızdik kemesiniń qurylysy júrip jatyr, ol arqyly reseılik jáne sheteldik týrıster Kaspıı teńizinde krýızge shyǵa alady.
Ol sondaı-aq bıylǵy jyly Reseı men Qazaqstan arasyndaǵy týrıstik aǵyndy damytý bolashaǵyna toqtaldy.
«2023-2024 jyldary Almaty qalasy ShYU-nyń týrıstik jáne mádenı astanasy bolyp jarııalandy. Biz bul sheshimdi quptaımyz jáne Qazaqstanmen týrıstik yntymaqtastyqty ilgeriletý boıynsha odan ári belsendi jumys isteýge daıynbyz. Reseıde Qazaqstan Abhazııa men Túrkııadan keıin baratyn tanymal baǵyttardyń ishinde úshinshi orynda. Reseı óz kezeginde Qazaqstanǵa keletin týrıster sany boıynsha birinshi orynda tur», - dep atap ótti mınıstrdiń orynbasary.
Sońǵy kezderi eki el arasynda ózara týrıstik saıahat aıtarlyqtaı artqan. 2022 jyly Reseı azamattarynyń Qazaqstanǵa týrıstik saparlarynyń sany 2,4 mln adamdy qurady. Reseıge Qazaqstannan 1,7 mln-ǵa jýyq týrıst kelgen. 2023 jyldyń 9 aıynda Qazaqstannan saparlar sany 1,6 mln-nan asty, al Reseıden Qazaqstanǵa týrıstik aǵyn 2,2 mln adamdy qurady.
Qazaqstan aýmaǵynda «Týrıstik karta» tólem qyzmetin engizý boıynsha jumys júrgizilip jatqan 25 eldiń qataryna kirdi. Bul qyzmet Qazaqstannan kelgen týrısterge Reseıde qolma-qol aqshasyz esep aıyrysýlardy jyldam jáne yńǵaıly júrgizýge múmkindik beredi. Respýblıka turǵyndary «MIR» vırtýaldy kartasy bar elektrondy ámııandy rásimdep, ol arqyly Reseıdegi qonaqúı, transfer jáne basqa týrıstik qyzmetterdi tóleı alady.
Ol sondaı-aq Reseı men Qazaqstan arasyndaǵy týrıstik aǵyndy damytýǵa baǵyttalǵan Reseıdiń «Roza Hýtor» taýly kýrorty, qazaqstandyq Shymbulaq, Ózbekstannyń Ámirsoıy jáne Ázerbaıjan Shahdaǵy kiretin Taýly kýrorttardyń Eýrazııalyq alıansyn qurý jónindegi birlesken bastamanyń da baǵyttalǵanyn eske saldy.
«Qazaqstandyq jáne reseılik týrıster bizdiń birlesken týrıstik baǵyttarymyzǵa ǵashyq boldy: Omby, Pavlodar jáne Almaty qalalaryn aralatatyn «Jarq etken meteor» týry, Orynbor oblysyndaǵy Shaǵan ózeni boıyndaǵy baǵdar, Túmen oblysyndaǵy «Kógildir kólderge» saıahat. Biz qazir Qazaqstanmen shektesetin ulttyq týrıstik baǵdarlardy qurý jóninde kelissózder júrgizip jatyrmyz. Týrıster úshin osyndaı eki baǵdar bar – Altaı ólkesimen shekaradaǵy «Sálem, Altaı!» jáne Saratov oblysymen shekaradaǵy «Volje nemisteri», - dedi D.Volvach.
Onyń aıtýynsha, Reseı men Qazaqstan Belýha taýy aımaǵynda transshekaralyq týrıstik aımaqty damytýǵa múddeli. Qazirgi ýaqytta taraptar reseılik-qazaqstandyq shekaradan ótýge erekshe quqyqtyq mártebe beretin úkimetaralyq kelisimniń jobasyn ázirleýde.
