Reseı qalalarynda Qazaqstan mektepteri ashylady dep senemiz – Qasym-Jomart Toqaev

ASTANA. KAZINFORM – Qazaqstan men Reseı arasyndaǵy mádenı-gýmanıtarlyq baılanys qarqyndy damyp keledi. Bul týraly Qazaqstan Prezıdenti Qasym-Jomart Toqaev «Izvestııa» gazetine jarııalanǵan maqalasynda jazdy.

«Elderimiz Uly Jeńistiń 80 jyldyǵyn laıyqty atap ótýge daıyndalyp jatyr. Ortaq tarıhqa degen qurmet árdaıym Qazaqstan men Reseı yntymaqtastyǵyna arqaý bolary sózsiz. HH ǵasyrda bizdiń halyqtarymyz adamzat tarıhyndaǵy eń surapyl soǵysta fashızmdi jeńip, aýyr synaqty birge eńserdi. Qazaqstandyqtar qan maıdanda jan aıamaı soǵysty. Qazaqstan armııany kerek-jaraqpen jáne azyq-túlikpen qamtamasyz etip, senimdi strategııalyq tyl boldy. Evakýatsııa kezinde júzdegen myń otbasy qazaq jerinen pana tapty. «Eshkim de, eshteńe de umytylmaıdy» degen sóz qazaqstandyqtar úshin jalań uran emes. Bul uǵym maıdangerler men tyl eńbekkerleriniń qaıtalanbas erligi el jadynda máńgi saqtalatynyn bildiredi», — dep atap ótedi Memleket basshysy. 

Prezıdenttiń atap ótýinshe, eki el arasyndaǵy mádenı-gýmanıtarlyq baılanys ta qarqyndy damyp keledi. Kópshilik kóńilinen shyǵatyn mádenıet kúnderi, festıvalder men kórmeler turaqty ótkizilip turady.

«Byltyr elimizde «orys maýsymy» degen ataýmen aýqymdy is-sharalar uıymdastyryldy. Al bıyl Máskeýde Astananyń mádenıet kúnderi ótti. Ondaǵy eń negizgi oqıǵa retinde «Abaı» operasynyń Úlken teatrda qoıylǵanyn aıtýǵa bolady. Sondaı-aq, Reseıdiń basty murajaılary — Tretıakov galereıasynda jáne Ermıtajda Qazaqstannyń kórmesi ashylady», — dedi Qasym-Jomart Toqaev.

Memleket basshysy Qazaqstan komandasy Reseıdiń Qazan qalasynda ótken «Bolashaq oıyndaryna» qatysqanyna nazar aýdartady. 

«Al, Astanadaǵy Dúnıejúzilik kóshpendiler oıyndarynda Reseı sportshylary óner kórsetti. Bul — mádenı-gýmanıtarlyq qarym-qatynasty jańa formatta órbitý mańyzdy ekeniniń belgisi. Biz osy ıgi dástúrdi jalǵastyryp, Reseı bastamasymen qolǵa alynǵan «Bolashaq oıyndarynyń» kezekti saıysyn 2026 jyly Qazaqstanda ótkizemiz. Bilim salasyndaǵy yntymaqtastyqtyń da mazmuny tolyǵa tústi. Biz elimizdiń ońtústik aımaqtarynda Reseı mektepterin ashýdy josparlap otyrmyz. Sol sııaqty bizben irgeles jatqan Reseı qalalarynda Qazaqstan mektepteri ashylady dep senemiz», — dedi Prezıdent.

Eske sala keteıik, buǵan deıin Prezıdenttiń shaqyrýymen Vladımır Pýtın Qazaqstanǵa memlekettik saparmen keletinin jazǵan bolatynbyz.