Reseı: Irkýtsk oblysynda sý basqan aýdandardan myńdaǵan adam evakýatsııalandy
IRKÝTSK. TASS-QazAqparat – Qutqarýshylar bir táýlik ishinde Reseıdiń Irkýtsk oblysyndaǵy sý basqan aýdandardan myńnan astam adamdy evakýatsııalady, dep habarlaıdy QazAqparat TASS agenttigine silteme jasap.
«1 myń 76 adam, sonyń ishinde 615 bala qaýipsiz jerge kóshirildi. Qazir ýaqytsha ornalastyrý pýnktterinde 41 adam bar, sonyń segizi – bala», - delingen habarlamada.
Jeksenbi kúngi nóser saldarynan oblystyń alty aýdany: Nıjneýdınsk, Cheremhovsk, Týlýnsk, Shelehovsk, Slıýdıansk, Zımınsk aýdandary sýdyń astynda qalǵan. Dúısenbi kúni 07:00-degi derek boıynsha, 147 turǵyn úıdi, 42 úıdiń aýlasyn, 269 úı mańyndaǵy aýmaqty sý basqan.
Irkýtsk oblystyq gıdrometeorologııa jáne qorshaǵan ortaǵa monıtorıng júrgizý basqarmasynyń aqparatyna qaraǵanda, óńirdiń ońtústik aýdandarynda nóser dúısenbi kúni de tolastamaq emes.
Tótenshe jaǵdaıǵa shuǵyl qyzmetter ázir tur. Turǵyndarǵa buqaralyq aqparat quraldary, sms-habarlamalar arqyly habar berilip otyr.
