Reseı ІІM reformalaý memleketke 327 mlrd. rýblge túsedi
ASTANA. Qyrkúıektiń 24-i. QazAqparat - Іshki ister mınıstrligin reformalaý memleketke 2012 jyly 138 mlrd. rýblge, al 2013 jyly taǵy da 189 mlrd. rýblge túspek. Bul týraly keshe ótken Reseı Úkimetiniń keńeıtilgen qorytyndy otyrysynda RF úkimetiniń vıtse-premeri - qarjy mınıstri Alekseı Kýdrın málim etti dep habarlaıdy RBK.
"Bul qarajattar 2012 jyldyń bıýdjetine "Shartty bekitilgen shyǵyndar" baby boıynsha engizilip otyr, - dep málimdedi A.Kýdrın. Sonymen qatar ol shartty bekitilgen shyǵyndardyń 2012 jyly 280 mlrd. rýbldi nemese barlyq shyǵyndardyń 2,5% paıyzyn quraıtyndyǵyn da atap ótti.
Vıtse-premerdiń aıtýynsha, bólingen qarajattyń orta eseppen 30% paıyzy aqshalaı ІІM júıesine barlyq qyzmetkerlerdiń jalaqysyna ústeme retinde qosylmaqshy. Budan basqa quqyq qorǵaý organdaryn tehnıkalyq jaraqtandyrý shyǵyndary da qarastyrylǵan.
