Reseı: Hımkı qalasynda turǵyn úıde jarylys bolyp, úsh adam qaza tapty

NUR-SULTAN. QazAqparat – Hımkıdegi toǵyz qabatty úıde jarylys bolyp, sonyń saldarynan órt shyqty. Nátıjesinde úsh adam qaıtys boldy, olardyń biri – bala. Taǵy tórteýi zardap shekti, dep habarlaıdy QazAqparat TASS agenttigine silteme jasap.

«Zelenaıa kóshesi, 16 úı» mekenjaıynda ornalasqan úıde órt shyqqany jaıly habarlama tótenshe jaǵdaılar mınıstrligine 19 naýryzda saǵat 10:24-te kelip túsken.

Aqparat kóziniń habarlaýynsha, ǵımaratta bes páter órtengen. Segizinshi jáne toǵyzynshy qabattar arasynda bólme aralyq qalqalar men jabyndar opyrylyp qulady.

Kýágerlerdiń aıtýynsha, birneshe qabattaǵy balkondar qırap, kóptegen tereze synǵan. TJM málimetinshe, opyrylǵan jerdiń alańy 25 sharshy metrdi, órt alańy 12 sharshy metrdi qurady.

Tótenshe jaǵdaılar qyzmeti bastapqyda «jarylys kezinde er adam qaıtys boldy, áıel jaraqat aldy, eki bala úıindi astynda qaldy» dep habarlady. Keıinirek olardyń bireýi qutqaryldy, al ekinshisi óli tabyldy.

Derekkózdiń habarlaýynsha, turmystyq gaz jarylǵan. Qazir jarylystyń eki sebebi qarastyrylýda – gaz jabdyqtarynyń aqaýy jáne gazdyń aǵyp ketýi. Tótenshe jaǵdaıdan keıin úıdegi 30-dan astam páter gazdan ajyratyldy. Zardap shekken úıdiń eki kireberisiniń turǵyndary evakýatsııalandy, olar ýaqytsha ornalastyrý pýnktine jetkizildi.

Tergeý komıteti úsh adamnyń ólimine qatysty qylmystyq is qozǵady. Máskeý oblysynyń gýbernatory Andreı Vorobev Hımkı qalalyq okrýginiń basshysy Dmıtrıı Voloshınge jarylys bolǵan úıdiń turǵyndaryna barlyq qajetti kómek kórsetýdi tapsyrdy.