Reseı halqy aza tutýda
ASTANA. QazAqparat - Dúısenbi kúni, 26 jeltoqsan Reseıde Jalpyulttyq aza tutý kúni bolyp jarııalandy. El prezıdenti Vladımır Pýtın Qara Teńiz ústinde bolǵan áýe apatyna baılanysty, osyndaı sheshim qabyldady.
Odan bólek, reseılik kóshbasshy el aýmaǵyndaǵy memlekettik týlardy túsirý; mádenıet mekemeleri men teleradıokompanııalarǵa oıyn-saýyq sharalary men baǵdarlamalardan bas tartý jáne qaza tapqandardyń otbasylaryna kómek kórsetý boıynsha qajetti sharalardy jasaý týraly qaýly etti.
Jeksenbi kúni 25 jeltoqsanda Sırııaǵa bet alǵan Tý-154 áskerı ushaǵy Qara teńizge qulady. Qorǵanys mınıstrliginiń habarlaýynsha, ushaq bortynda 92 adam bolǵan - segiz ekıpaj múshesi jáne 84 jolaýshy. Jolaýshylar arasynda segiz áskerı, Valerıı Halılov jetekshilik etken Aleksandrov atyndaǵy ansamldiń 64 ártisi, úsh telearna ókili, áskerıler, «Doktor Lıza» degen ataýmen tanymal «Ádiletti kómek» qaıyrymdylyq qorynyń basshysy Elızaveta Glınka jáne RF qorǵanys mınıstrliginiń mádenıet departamentiniń basshysy Anton Gýbankov bolǵan.
RF Qorǵanys mınıstrligine qaraıtyn ushaq sırııalyq Latakııaǵa reıs jasaǵan. Ártister Sırııadaǵy jaýyngerlerdi Jańa jylmen quttyqtaýǵa bara jatqan. Ushaq Máskeý ýaqytymen saǵat 5:20-da Sochıden ushyp, 20 mınýttan keıin radardan joǵalǵan jáne Qara Teńizge qulaǵan.
Vladımır Pýtın qaıǵyly oqıǵany muqııat tergeýge jáne qaza tapqandardyń otbasyna kómek kórsetýge ýáde berdi. Úkimettik komıssııaǵa kólik mınıstri Maksım Sokolov jetekshilik etýde.
RF kólik mınıstrliginiń málimetterine súıensek, apatta mert bolǵandardyń máıitin taný jumystary Máskeý qalasynda júredi. Mekeme basshysy izdestirý-qutqarý operatsııasynyń merzimi anyqtalmaǵandyqtan, qaza tapqandardyń týystary men jaqyndaryna Sochıǵa kelýdiń qajeti joq ekenin habarlady. Ázirge mamandar Qara Teńizdegi Tý-154 ushaǵy qulaǵan oryndy shamamen boljap otyr. Laınerdiń qulaýy múmkin dep boljanǵan oryndaǵy sý túbin zertteý úshin gıdrolokatorlarmen jabdyqtalǵan kemeler túsirildi.
RF Ońtústik áskerı okrýgynyń bólimsheleri men jergilikti tótenshe qyzmet birlesip, qaıǵyly oqıǵaǵa baılanysty zattardy alý úshin jaǵalaýdy tekserip jatyr. Іzdeý aımaǵyndaǵy súńgýirler toby 109 adamǵa deıin ulǵaıdy. Mamandar radıolokatsııalyq quraldardan málimetter alyp, Tý-154 ushaǵynyń ushý traektorııasyn anyqtady. «Bul ushaq qulaǵan aýdandy naqty anyqtaýǵa múmkindik berdi. Boljanǵan aýdandaǵy izdestirý-qutqarý operatsııasy teńizdiń tereńdigimen jáne teńiz túbiniń bederimen qıyndaı tústi», - dep habarlady RF Qorǵanys mınıstrligi.
«Áýe apaty aýdanyndaǵy izdestirý-qutqarý kúshteriniń toby ulǵaıýda. Іzdestirý-qutqarý jumystary úsh aýysymmen júrip jatyr. Qutqarýshylar sany 3500 adamǵa deıin jetti», - delingen habarlamada.
Sonymen birge, arnaıy operatsııa júrip jatqan aýdanǵa 16 súńgýir men «Taıger» telebasqarý apparaty bar Qara teńiz flotynyń «Epron» qutqarý kemesi kele jatyr. Jaqyn arada apat ornyna Il-76 ushaqtarymen Reseı geografııalyq qoǵamynyń eki tereń sýasty apparaty jetkiziledi
