Reseı gazdy Qytaıǵa Qazaqstan aýmaǵy arqyly eksporttaı alady

ASTANA. QazAqparat - Qazaqstan reseılik gazdy Qytaıǵa jetkizý úshin óziniń magıstralin berýge daıyn. Bul týraly QR Energetıka mınıstri Qanat Bozymbaev málim etti, dep xabarlaıdy QazAqparat.

Mınıstrliktiń keńeıtilgen alqa otyrysynda Q. Bozymbaev, óz kezeginde Qazaqstan da óz gazyn Qytaıǵa eksporttaı alatyndyǵyn atap ótti.

«Beıneý-Bozoı-Shymkent» gaz qubyrynyń jelilik bóligi salyndy jáne eksporttalýda. 5 mlrd tekshe metr gaz esporttalyp úlgerdi. Onyń ishinde 2 mlrd tekshe metri 2016 jyly tasymaldandy. Bıyl gaz qubyrynyń jobalyq qýaty 10 mlrd tekshe metrge deıin jetkiziledi. Eger kezekti kelisimderge qol qoıylsa, otandyq gazdyń bir bóligin Qytaıǵa eksporttaýǵa múmkindik bar. Sonymen qatar Qytaıǵa joldanatyn reseılik gazdyń tranzıtin qazaqstandyq magıstraldar arqyly jetkizý múmkindigi de qarastyrylýda», - dedi Bozymbaev.

Mınıstrdiń aıtýynsha, táýelsizdik jyldary ishinde elde aýqymdy gaz tasymaly júıesi quryldy. Jańa eksporttyq jáne tranzıttik marshrýttar ashyldy. 18 myń shaqyrym magıstraldi jáne 30 myń shaqyrym úlestirý gaz qubyrlary salyndy.