Reseı ǵalymy «Spýtnık V» vaktsınasyna qatysty aıtylǵan synǵa túsinikteme berdi
NUR-SULTAN. QazAqparat – AQSh, Italııa jáne basqa elderdiń ýnıversıtetterinen zertteýshiler toby The Lancet jýrnalynyń redaktsııasyna hat jazyp, preparatty synaý nátıjelerinde statıstıkalyq aýytqýlar bar ekendigin aıtqan, dep habarlaıdy QazAqparat TASS saıtyna silteme jasap.
Reseıdiń «Spýtnık V» vaktsınasyn synaýdyń eki kezeńdegi nátıjelerin The Lancet ǵylymı jýrnalynda jarııalaý – vaktsına ázirleýdiń sapasyn arttyratyn oń qadam. Seısenbide TASS tilshisine bergen suhbatynda RǴA korrespondent-múshesi, Soltústik Karolına ýnıversıtetiniń (AQSh) jáne M.V. Lomonosov atyndaǵy Máskeý memlekettik ýnıversıtetiniń professory Aleksandr Kabanov osyndaı pikir bildirdi.
«Reseılik vaktsına jaıly málimetterdi synaýǵa keler bolsaq, birinshiden, nátıjelerdi synaý – qalypty ǵylymı protsestiń bóligi. Ásirese pandemııa jaǵdaıyndaǵy vaktsına nemese dári-dármek sııaqty áleýmettik mańyzy bar jumystarǵa qatysty atatyn bolsa», – deıdi RǴA korrespondent múshesi.
«Ekinshiden, bul Reseıge, vaktsınaǵa nemese ǵalymdarǵa qarsy baǵyttalǵan syn emes. Mysaly, úsh aı buryn, eki jýrnaldan, sonyń ishinde osy The Lancet jýrnalynan amerıkalyq ǵalymdardyń maqalalary alynyp tastalǵan edi. Sebebi nátıjeler synǵa ushyraǵan jáne maqala avtorlary dári-dármekti koronavırýsty emdeýde qoldaný týraly alǵashqy málimetterdi berýden bas tartqan», – dedi ǵalym.
«Úshinshiden, syn aıtý – nátıje durys emes degendi bildirmeıdi. Muny synshylar da aıtyp otyr. Olar bastapqy sandyq derektersiz Reseı vaktsınasy týraly maqaladaǵy málimetterdiń senimdiligi jóninde qorytyndy jasaý múmkin emes ekenin atap ótti», – dep túsindirdi Kabanov.
«Gamaleıa ınstıtýtynda jasalǵan reseılik vaktsına sátti bolady dep úmittenemin. Osyǵan baılanysty men ony ázirleýshilerge, sondaı-aq koronavırýsqa qarsy senimdi jáne qaýipsiz vaktsınany qajet etetin barlyq Reseı azamattaryna sáttilik tileımin», – dedi ǵalym.
