Reseı ǵalymdary bolashaq dárilerge negiz bolatyn jańa molekýlalardy jasap shyǵardy

ASTANA. KAZINFORM – Krasnoıarsk qalasyndaǵy akademık M.F.Reshetnev atyndaǵy Sibir memlekettik ǵylym jáne tehnologııalar ýnıversıteti ǵalymdary zerthanada buryn bolmaǵan on jańa hımııalyq qosylysty jasap shyǵardy. Bul zattar bolashaqta jańa dárilik preparattar ázirleýge negiz bolýy múmkin, dep habarlaıdy TASS.

Ýnıversıtettiń baspasóz qyzmetiniń málimetinshe, zertteý organıkalyq hımııa jáne tehnologııa kafedrasynda júrgizilgen. Ǵalymdar azot atomy bar kúrdeli organıkalyq molekýlalardy arnaıy hımııalyq reaktsııalar arqyly alǵan. Mundaı qosylystar farmatsevtıka salasynda joǵary bıologııalyq belsendiligimen baǵalanady.

Zerthanada hınolın, gıdrazınılftalazın, benzotıazol, pırazol jáne gıdrazınıltrıazol týyndylary ázirlengen. Buǵan deıin mundaı qurylymdardy alý tásilderi jetkilikti zerttelmegendikten, olardy is júzinde qoldaný shekteýli bolǵan.

Joba jetekshisi, hımııa ǵylymdarynyń kandıdaty Pavel Bobrovtiń aıtýynsha, jańa molekýlalardyń qurylymy men qasıetterin jan-jaqty zertteý olardyń qaı baǵytta tıimdi qoldanylatynyn anyqtaýǵa múmkindik beredi.

– Biz alǵan qosylystardyń birqataryn bıologııalyq belsendilikke synaýǵa usynyp otyrmyz. Olar mıkrobqa, isikke jáne qabynýǵa qarsy dáriler jasaýǵa negiz bolýy múmkin. Sonymen qatar bul zattardy belgili bir qasıetteri bar jańa materıaldar ázirleýde de qoldanýǵa bolady, – dedi Pavel Bobrov.

Ǵalymdardyń pikirinshe, jańa qosylystar dárilik zattardy izdeýge arnalǵan hımııalyq qurylymdar qoryn keńeıtedi. Bul farmatsevterge bolashaqta tıimdi ári zamanaýı preparattar ázirleý múmkindigin arttyrady.

Aıta keteıik, Qazaqstanda 400-den astam jańa dári-dármek óndiriledi.