Reseı fýtbol quramasy FIFA jáne UEFA aıasyndaǵy barlyq týrnırden shettetildi

NUR-SULTAN. QazAqparat - Fýtboldan Reseı ulttyq quramasy men klýbtary FIFA jáne UEFA aıasyndaǵy barlyq týrnırden shettetildi, dep habarlaıdy QazAqparat tilshisi.

Bul jóninde UEFA saıtynda habarlandy.

Atalǵan sheshim Eýropadaǵy jaǵdaıdyń kúrdelenýine baılanysty qabyldanǵan.

Aıta ketsek, Reseı quramasy 24 naýryzda 2022 jylǵy álem chempıonatyna pleı-off satysynda Polshamen kezdesý ótkizý tıis bolatyn.

Qarsylasyn jeńgen jaǵdaıda 29 naýryzda pleı-off satysynyń fınalynda Chehııa jáne Shvetsııa jubynyń jeńimpazymen sheberlik baıqasatyn edi.

Sondaı-aq, Eýropa lıgasy 1/8 fınalynda Reseıdiń «Spartak» (Máskeý) komandasy 10 jáne 17 naýryz kúnderi Germanııanyń «RB Leıptsıg» klýbymen kezdesýi josparlanǵan.

Eske salsaq, budan buryn bıyl Chempıondar lıgasynyń fınaldyq matchy Parıjde ótetini habarlandy.