Reseı Federatsııasynyń prezıdenti resmı saparmen Mońǵolııaǵa bardy
ASTANA. KAZINFORM – Reseı Federatsııasynyń Prezıdenti Vladımır Pýtın 2024 jyldyń 2 qyrkúıeginde Mońǵolııaǵa resmı saparmen keldi, dep habarlaıdy Mońǵolııanyń MONTsAME aqparat agenttigi.
«Býıant-Ýhaa» halyqaralyq áýejaıynda Reseı Federatsııasynyń Prezıdenti men onymen birge kelgen delegatsııany Mońǵolııa Syrtqy ister mınıstri Batmýnhıın Battsetseg, Reseı Federatsııasynyń Mońǵolııadaǵy Tótenshe jáne Ókiletti Elshisi Alekseı Evsıkov jáne basqa resmı tulǵalar kútip aldy.
Sapar barysynda prezıdent Ýhnaagıın Hýrelsýh pen prezıdent Vladımır Pýtın resmı kelissózder júrgizip, ekijaqty qarym-qatynastar men yntymaqtastyqty odan ári damytý perspektıvalary týraly pikir almasady, sondaı-aq ekijaqty qujattarǵa qol qoıý rásimine qatysady.
Resmı kelissózderdiń qorytyndysy boıynsha eki memleket basshysy BAQ ókilderi úshin birlesken brıfıng ótkizedi.
2019 jyly Mońǵolııa men Reseı Federatsııasy «Dostyq qatynastar jáne jan-jaqty strategııalyq áriptestik týraly kelisimshartqa» qol qoıdy.
Mońǵolııa men Reseı Federatsııasy 1921 jyly 5 qarashada dıplomatııalyq qatynas ornatyp, 1922 jyly Ulanbatyr men Máskeýde Elshilikterin ashty.
