Reseı Federatsııasyna vızasyz kirýdiń jańa erejeleri jarııalandy
ASTANA. KAZINFORM — Qazaqstandaǵy Reseı Federatsııasynyń elshiligi elge kirýge qatysty úndeý jarııalady.
2025 jylǵy 30 maýsymnan 2026 jylǵy 30 maýsymǵa deıin Reseı Federatsııasynyń Memlekettik shekarasy arqyly ótetin barlyq ótkizý beketinde shetel azamattary men azamattyǵy joq adamdardyń Reseı Federatsııasyna kirý jáne shyǵý tártibin synaqtan ótkizýge baǵyttalǵan eksperıment júrgiziledi. Bul erejeler eksperımentti uıymdastyrý qaǵıdalaryna sáıkes júzege asyrylady.
Atap aıtqanda, vızasyz tártippen Reseı Federatsııasyna kirmekshi bolǵan shetel azamattaryna biryńǵaı sáıkestendirý jáne aýtentıfıkatsııa júıesinde (ESIA) aldyn ala tirkeýden ótý jáne «ruID» mobıldi qosymshasy arqyly Reseıge kirý týraly ótinishti elektrondyq túrde usyný usynylady.
Jańa tártip — Reseıge kiretin shetel azamattaryn tirkeýdiń eksperımenttik tártibi — Qazaqstan Respýblıkasy men Reseı Federatsııasy azamattarynyń ózara vızasyz sapar rejıminiń ózgerisi emes. Sonymen qatar, «ruID» qosymshasyn paıdalanyp, Reseıge kirý týraly ótinishti toltyrý — erikti sıpatta ekenin eske salamyz.
Kirý týraly ótinishtiń bolmaýy Reseı shekarashylarynyń baqylaý júrgizýine áser etpeıdi. Degenmen, qosymsha arqyly tirkeýden ótýdi usynamyz, óıtkeni bul sizge Reseı aýmaǵynda memlekettik onlaın qyzmetke, reseılik uıaly baılanys operatorlarynyń qyzmetine tólem júrgizý múmkindikterine jáne basqa da artyqshylyqtarǵa qol jetkizýge múmkindik beredi.
Qosymshamen jumys isteý tártibi men onyń múmkindikteri týraly tolyq aqparat Reseı Federatsııasynyń Tsıfrlyq damý, baılanys jáne buqaralyq kommýnıkatsııalar mınıstrliginiń jańartylǵan materıaldarynda baıandalǵan.
Jańa erejelerge sáıkes, kirý týraly ótinish aldyn ala — sapardan 72 saǵat buryn jáne 90 kúnnen erte emes merzimde berilýi tıis. Shuǵyl jaǵdaılarda (mysaly, týysynyń syrqattanýy nemese qaıtys bolýy) ótinishti 4 saǵat ishinde resimdeýge bolady, ol úshin arnaıy jaǵdaıdy rastaıtyn qujatty usyný qajet.
Ótinish berý úshin «ruID» qosymshasyn ornatyńyz (qosymshalar dúkeninde 2025 jylǵy 24 maýsymǵa deıin qoljetimdi) jáne tirkelińiz. Eger sizde Reseıdiń memlekettik qyzmetter portalynda akkaýntyńyz bar bolsa, onda «ruID» qosymshasyna sol logın men qupııasóz arqyly kire alasyz.
Ótinishte kelesi aqparatty kórsetý qajet:
— qaı elden shyǵasyz;
— sapar maqsaty men merzimi;
— Reseıdiń qaı óńirlerine barýdy josparlap otyrsyz;
— birge saıahattaıtyn jaqyndaryńyz týraly málimet (balalardyń deregin eki ata-ana da kórsetýi kerek).
Qosymsha arqyly bıometrııalyq derekti tapsyrýǵa bolady, ıaǵnı bet fotosy, tólqujat jáne daýys jazý. Eger sizdiń bıometrııalyq derekterińiz buryn Reseıde tirkelgen bolsa, onda ótinishti memlekettik qyzmetter portaly arqyly da berýge bolady, sapar týraly aqparatty kórsetip, betińizdiń sýretin jiberý jetkilikti. Shekaradan ótken kezde siz qosymshada kórsetken jeke basyńyzdy kýálandyratyn qujatty kórsetý qajet.
Reseıge kirgennen keıin 10 kún ishinde Biryńǵaı bıometrııalyq júıede (BBJ) bıometrııalyq tirkeýdi aıaqtaý qajet, ol úshin jeke basyńyzdy kýálandyratyn qujattarmen bank bólimshesine barýyńyz kerek.
Sondaı-aq, Reseı aýmaǵynda ornalasqan qyzmet kórsetý ortalyǵyna nemese HQKO-ǵa (MFTs) baryp, Memlekettik qyzmetter portalyndaǵy akkaýntyńyzdy rastaý usynylady. Bul arqyly siz:
◾️barlyq qoljetimdi memlekettik onlaın qyzmetti paıdalana alasyz;
◾️reseılik SIM-karta ala alasyz;
◾️aıyppuldy, salyq bereshekterin jáne memlekettik bajdy tóleı alasyz.
— Nazar aýdaryńyz, vızalyq rejımmen, onyń ishinde biryńǵaı elektrondyq vıza arqyly Reseıge kirý tártibi ózgerissiz qalady, — dep eskertedi elshilik.
QR Syrtqy ister mınıstrliginiń resmı ókili Aıbek Smadııarov Reseı tarapynan 30 maýsymnan bastap engiziletin shekaralyq baqylaýdyń jańa talaptaryna qatysty pikir bildirdi.
Eske salaıyq, 30 maýsymnan bastap Reseıge kirý úshin keminde 72 saǵat buryn RuID platformasy arqyly elektrondy ótinish berý jáne biregeı QR-kod alý qajet bolady. Shekaradan ótý kezinde saýsaq izderin tapsyryp, sýretke túsip, bıometrııalyq sáıkestendirýden ótý de talap etiledi.