Reseı Federatsııasynyń boljamyna baılanysty astyqtyń álemdik baǵasy qymbattap otyr
ASTANA. Tamyzdyń 24-i. QazAqparat - Bıylǵy astyqqa qatysty Reseıden jetken boljamnyń jaısyzdyǵyna baılanysty bıdaıdyń álemdik baǵasy qymbattap otyr, dep habarlaıdy RSN agenttigi.
Qazirgi tańda AQSh-ta astyqtyń jeltoqsan aıyndaǵy jetkiziliminiń kelisimsharty 7,25 dollar/býshel baǵamen (27 kelige jýyq) jasalýda. Osylaısha, keshegi dúısenbi kúni, bir kúnniń ishinde astyqtyń baǵasy 13,5 tsentke derlik qymbattady, dep habarlaıdy RBK.
Esterińizge sala keteıik, Reseıde bıyl qurǵaqshylyqtyń saldarynan 10 mıllıonnan astam gektar alqaptyń astyǵy kúıip ketip otyr, bul jalpy egistik alqabynyń 30 paıyzdan astamyn quraıdy. Osyǵan oraı RF Úkimeti qurǵaqshylyq saldarynan týyndap otyrǵan ishki suranysty qamtamasyz etý maqsatynda, tamyzdyń 15-i men jeltoqsannyń 31-i aralyǵynda astyq eksportyna embargo engizdi.
Reseıdiń Aýyl sharýashylyǵy mınıstrliginiń derekteri boıynsha Reseı aǵymdaǵy jyly eń az degende 60 mıllıon tonna astyq jınaı alady, oǵan qosa qorda taǵy 21-24 mıllıon tonnadaı astyq bar, al eldiń ishki suranysyna 77-78 mıllıon tonna astyq qajet.
Degenmen, sarapshylar naqty boljam jasaýǵa asyqpaýda, olar Reseıde egin oraǵynyń qorytyndysy shyǵarylatyn qazan aıyn kútýde.
