Reseı energojúıesine salynǵan sanktsııalar Qazaqstannyń munaı sektoryna áser etpeıdi
«Negizi halyqaralyq sanktsııalar bul Reseıge qatysty, Qazaqstanǵa sanktsııanyń qatysy joq, bolashaqta bolady dep te kútip, boljaǵan emespiz. Tipti teorııalyq turǵydan alsaq ta, Reseıge qatysty sanktsııalar Qazaqstannyń munaı salasyna áser etken kúnniń ózinde de, bul tek eń birinshi kezekte munaı eksportymen baılanysty bolýy yqtımal», - dedi Uzaqbaı Qarabalın.
Onyń aıtýynsha, qazir Qazaqstannan negizinen sheteldik ınvestorlarǵa tıesili munaı eksporttalyp jatyr. Al qazaqstandyq kompanııalar óndiretin munaıdyń basym bóligi ishki zaýyttardy qamtamasyz etýge baǵyttalady.
«Munaıdyń jekelegen bóliginiń 50 paıyzdan sál astamy eksportqa ketedi, al negizinen bul sheteldik ınvestorlar, sonyń ishinde eýropalyq jáne AQSh ınvestorlaryna tıesili. Meniń oıymsha, álgi elder ózderiniń kompanııalaryna qatysty sanktsııa sala almaıtyn shyǵar», - dedi Munaı jáne gaz mınıstri.
Sonymen qatar, vedomstvo basshysy qazaqstandyq munaıdyń bir bóligi dástúrli baǵytta Atyraý-Samara jáne odan ári transmunaı júıesimen eksporttalatynyn aıtty.
«Munaı eksportynyń ekinshi mańyzdy «qan tamyry»
Kaspıı qubyr jelisi konsortsıýmy bolyp tabylady. Sondyqtan da, Qazaqstan osy munaı qubyryn keńeıtý baǵytynda jumys istemek. Jaqyn aralyqta bul baǵyttaǵy ótkizý qýaty jylyna 50 mln. tonnaǵa jetetin bolady», - dedi mınıstr Qarabalın.
