Reseı elshisi Mıhaıl Bocharnıkovtyń dıplomatııalyq mıssııasy aıaqtaldy
ASTANA. QazAqparat - Búgin Májilis tóraǵasy Nurlan Nyǵmatýlın Reseıdiń Qazaqstandaǵy Tótenshe jáne Ókiletti elshisi Mıhaıl Bocharnıkovty dıplomatııalyq mııssııasynyń aıaqtalýyna baılanysty qabyldady, dep habarlaıdy Májilistiń baspasóz qyzmeti.
M. Bocharnıkov Qazaqstanda 10 jyldan astam ýaqyt qyzmet etti. Taraptar osy ýaqyt aralyǵynda ekijaqty, sonyń ishinde, parlamentaralyq qarym-qatynasty nyǵaıtý jolynda jetken jetistikterge toqtaldy.
N. Nyǵmatýlın atap ótkendeı, Qazaqstan men Reseı prezıdentteriniń ózara túsinistik pen dostyq negizdegi salıqaly saıasattarynyń arqasynda ózara yntymaqtastyqtyń jarqyn úlgisine aınaldy.
Búginde Reseı Qazaqstannyń strategııalyq áriptesi, senimdi dosy jáne tatý kórshisi bolyp tabylady.
Qazirgi ýaqytta qazaqstandyq-reseılik ózara yqpaldastyq jáne parlamentaralyq áriptestik jyl saıyn jańa bıikterdi baǵyndyryp keledi. Osy oraıda Májilis tóraǵasy M. Bocharnıkovtyń úlesi zor ekenin alǵa tarta kelip, eleýli qyzmeti úshin alǵysyn jetkizdi.
Óz kezeginde M. Bocharnıkov bizdiń elimizde elshilik etken jyldary qyzmet jolyndaǵy eń jemisti kezeńderdiń biri ekenin aıtyp, sheksiz alǵys sezimin bildirdi.
