Reseı Elshisi Qazaqstannyń Syrtqy ister mınıstrligine shaqyryldy

ASTANA. QazAqparat – Elshi Petr Vrýblevskııdiń Qazaqstannan ketýine qatysty Ýkraına jaǵymen eshqandaı problema joq. Bul týraly QR Syrtyqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

«Qazaqstannyń Máskeýdegi Elshisi Reseı Syrtqy ister mınıstrligine shaqyrylǵan bolatyn. Bul qalypty dıplomatııalyq tájirıbe. Búgin Reseı Elshisi elimizdiń Syrtqy ister mınıstrligine shaqyryldy. Osy oraıda RF Syrtqy ister mınıstrligi resmı ókiliniń (Marııa Zaharovanyń) málimdemesi qaralady. Sonymen qatar, Reseı jaǵynyń Ýkraına Elshisine qatysty talaptary talqylanady», - dedi A. Smadııarov Parlament Májilisinde ótken brıfıngide.

Osy oraıda ol Ýkraınanyń Elshisi (Petr Vrýblevskıı) Qazaqstannan ketetinin aıtty. Ýkraınanyń Syrtqy ister mınıstrligi jańa elshi taǵaıyndaý týraly ótinish jiberdi. Qazir bul ótinish qarastyrylyp jatyr. P. Vrýblevskııdiń Qazaqstan Syrtqy ister mınıstrliginde nemese basqa da memlekettik vedomstvolarda qandaı da bir kezdesýleri josparlanbaǵan.

«Bul másele boıynsha Ýkraına jaǵymen bizdiń tolyq kelisimimiz bar. Qos tarap ýaǵdalastyqtaryn oryndady. Sondyqtan Ýkraına jaǵymen sheshilmegen eshqandaı másele joq. Qazaqstandaǵy Elshiniń ketýi týraly sheshimin Ýkraına Syrtqy ister mınıstrligi ózderi shyǵardy. Osy oraıda basqa Elshi taǵaıyndalmaq», - dedi resmı ókil.

Budan buryn habarlanǵandaı, bıyl tamyz aıynda Ýkraına Elshisi Petr Vrýblevskıı blogerge bergen suhbatyna qatysty QR Syrtqy ister mınıstrligine shaqyryldy.

Sonymen qatar A. Smadııarov Reseı Syrtqy ister mınıstrliginiń resmı ókili Marııa Zaharovanyń Ýkraına Elshisiniń Qazaqstannan «shyǵarylýyna» qatysty túsiniktemesine pikir bildirdi.

Foto:gov.kz