Reseı Elshiligi Baýyrjan Momyshulynyń nemere inisine qupııa qujattardy tapsyrdy

NUR-SULTAN. QazAqparat – Reseı Federatsııasynyń Qazaqstandaǵy Tótenshe jáne Ókiletti Elshisi Alekseı Borodavkın Baýyrjan Momyshulynyń qupııa qujattaryn týysyna tapsyrdy, dep habarlaıdy QazAqparat tilshisi.

Shara Qazaqstan Qarýly Kúshteriniń memlekettik áskerı-tarıhı murajaıynda ótti. Arhıvtik qujattardy Reseı Federatsııasynyń Qazaqstandaǵy Tótenshe jáne Ókiletti Elshisi Alekseı Borodavkın Halyq qaharmany Baýyrjan Momyshulynyń nemere inisi Beket Momynqulǵa tapsyrdy.

Elshiniń aıtýynsha bul qujattar búginge deıin Reseı memlekettik saıası-áleýmettik tarıh muraǵatynda «qupııa» belgisimen saqtalyp kelgen.

Qujattardyń ishinde batyrdyń partııa bıleti men bolshevıkterdiń Búkilodaqtyq Kommýnıstik partııasy múshesiniń esep kartochkasy, 1942 jyly jazylǵan BBKP múshesiniń tirkeý blankisi, fotosýretteri jáne t. b. bar.

Alekseı Borodavkın Reseı tarapy qazaqstandyq zertteýshilerge Máskeý jáne Podolsk qalasyndaǵy 11 myńnan astam áskerı qujattar saqtalǵan muraǵattarmen jumys isteýge múmkindik berýge daıyn ekenin jetkizdi.

Bıyl Tarazda dańqty qolbasshy Baýyrjan Momyshulynyń eskertkishi ashylǵan bolatyn.