Reseı ekonomıkasy baıaýlap keledi

MÁSKEÝ.KAZINFORM — Reseı ekonomıkalyq damý mınıstrliginiń (EDM) derekterine sáıkes, 2025 jyldyń birinshi jartyjyldyǵynyń qorytyndysy boıynsha Reseı ekonomıkasynyń ósý qarqyny 1,2%-ǵa deıin tómendedi, dep habarlaıdy agenttik tilshisi reseılik BAQ-qa silteme jasap.

Rosstattyń baǵalaýynsha, Reseı ekonomıkasynyń ósý qarqynynyń baıaýlaýy birinshi jáne ekinshi toqsandarda da saqtalǵan. EDM-de atap ótkendeı, qańtar-naýryz aılarynda ósim 1,4% bolsa, sáýir-maýsymda — 1,1%-dy qurady (2024 jyly Reseıdiń JІÓ 4,3%-ǵa ósken bolatyn).
Mınıstrlik Reseı ekonomıkasynyń salqyndaýy jalǵasyp jatqanyn jáne buǵan Reseı Banki júrgizip otyrǵan qatań aqsha-nesıe saıasaty áser etkenin aıttyp otyr.

Sondaı-aq, ekonomıka dınamıkasyna Batys sanktsııalarynyń yqpaly da artyp keledi. Olar reseılik kásiporyndardyń tehnologııalyq jabdyqqa qol jetkizýin qıyndatty jáne qoldanystaǵy óndiristi jańǵyrtý protsesin tejedi. Sonymen qatar, suranys pen usynys arasyndaǵy teńgerimsizdik baıqalady: suranystyń tómendeýi kadr tapshylyǵy aıasynda usynystyń shektelýimen qatar júrgizilip otyr.

Makroekonomıkalyq taldaý jáne qysqa merzimdi boljaý ortalyǵy (MTQBO) Reseı JІÓ ósiminiń nólge jýyq qarqyny retsessııanyń jaqyndap qalǵanyn bildiretinin eskertedi. Sarapshylardyń pikirinshe, 2026 jyly Reseı ekonomıkasynyń ósimi «nólge jýyq» bolýy múmkin.