Reseı EAEO elderinen ákelinetin taýarlardy rásimdeýdiń jeńildetilgen tártibiniń merzimin uzartty
ASTANA. KAZINFORM — Reseı Eýrazııalyq ekonomıkalyq odaq elderinen ákelinetin birqatar taýardy rásimdeý men tańbalaýdyń jeńildetilgen tártibin 2026 jylǵy 31 tamyzǵa deıin uzartty, dep habarlaıdy RBK.
Tıisti jarlyqqa Reseı prezıdenti Vladımır Pýtın qol qoıdy.
Qujat quqyqtyq aqparattyń resmı portalynda jarııalandy.
Ol bıylǵy 30 mamyrdan bastap kúshine endi.
Qoldanystaǵy tártipke sáıkes, Reseıdegi zańdy tulǵalar men jeke kásipkerler EAEO memleketterinen keıbir taýarlardy odaq ónimi ekenin rastaıtyn qujattarsyz ákele alady.
Sondaı-aq shekaradan ótkizý kezinde mindetti tańbalaý talap etilmeıdi.
Alaıda mundaı ónimder kedendik baqylaýmen ýaqytsha saqtaý qoımalaryna jetkizilýi tıis.
Sol jerde taýarlarǵa Reseı zańnamasynda kózdelgen mindetti tańbalaý men ózge de aqparattar engiziledi.
Osy rásimder aıaqtalǵannan keıin naryq qatysýshylary ónimdi aınalymǵa engizgeni týraly «Rospotrebnadzor» organyn habardar etýge mindetti.
Atalǵan erekshe tártip 2026 jylǵy sáýirde ýaqytsha shara retinde engizilgen bolatyn.
Bastapqyda onyń qoldanylý merzimi 31 mamyrǵa deıin belgilengen edi.
Buǵan deıin Reseıde 1 maýsymnan bastap júkterdi kútý faktisin rastaý júıesi (SPOT) engiziletini habarlanǵan.
Jańa talapqa sáıkes, avtomobıl kóligimen júk jetkizetin alýshylar aldaǵy tasymal týraly qujatty aldyn ala rásimdep, arnaıy QR-kod alýy qajet.
Bul QR-kod júrgizýshide bolýy jáne baqylaýshy organdardyń talaby boıynsha kórsetilýi tıis.
