Reseı EAEO elderin arzan ári jyldam ınternetpen qamtamasyz ete alady - Mıhaıl Mıshýstın

ALMATY. KAZINFORM – Reseı kelesi jyly joǵary ellıptıkalyq orbıtaǵa tórt baılanys ǵarysh apparatyn shyǵarýdy josparlap otyr. Bul týraly  Digital Almaty forýmynda Reseı Federatsııasy Úkimetiniń tóraǵasy Mıhaıl Mıshýstın málimdedi.

Mıhaıl Mıshýstınniń aıtýynsha, qyzmettiń jańa deńgeıin qamtamasyz etý úshin jetildirilgen ǵaryshtyq toptar men júıelerdi damytý negizgi baǵyttardyń biri. Kelesi jyly tórt baılanys ǵarysh apparatyn joǵary ellıptıkalyq orbıtaǵa shyǵarý josparlanyp otyr. Bul keń jolaqty jáne joǵary jyldamdyqty ınternetke qol jetkizýge múmkindik beredi.

– Sondaı-aq biz ózimizdiń tómengi orbıtalyq toptyń negizin jasaımyz. Aldaǵy ýaqytta tek Reseıdiń ǵana emes, EAEO elderin arzan, jyldam, eń bastysy senimdi ınternetke degen suranysyn tolyq qanaǵattandyra alatyn 300-ge jýyq qurylǵy jumys isteıtin bolady, – dedi ol.

Digital Almaty forýmy aıasynda ótken plenarlyq otyrysqa Ázerbaıjan Premer-mınıstri Álı Idaıat oǵly Asadov, Belarýs Respýblıkasynyń Premer-mınıstri Roman Golovchenko, Iran Islam Respýblıkasynyń birinshi vıtse-prezıdenti Aref Mohammad-Reza, Qyrǵyz Respýblıkasy Mınıstrler kabınetiniń tóraǵasy – Prezıdent Ákimshiliginiń basshysy Adylbek Qasymalıev, Reseı Federatsııasy Úkimetiniń tóraǵasy Mıhaıl Mıshýstın, Ózbekstan Respýblıkasynyń Premer-mınıstri Abdýlla Arıpov, Armenııa Respýblıkasynyń vıtse-premeri Mger Grıgorıan jáne EEK alqasynyń tóraǵasy Baqytjan Saǵyntaev qatysty.

Alańda AI-diń ekonomıkaǵa, ónerkásiptik ekojúıelerge, medıtsınaǵa, bilimge jáne basqa da salalarǵa ıntegratsııasy jáne ınnovatsııalyq damý perspektıvalary máseleleri kóterildi.

Osyǵan deıin Oljas Bektenov jasandy ıntellektiniń jahandyq ekonomıkaǵa úlesi 20 trln dollarǵa jetetini týraly aıtqan edi. 

Sondaı-aq QR Úkimetiniń basshysy Reseı kompanııalaryn ınvestıtsııalyq jobalarǵa belsendi atsalysýǵa shaqyrǵan bolatyn. 

Aıta keteıik, Prezıdent Reseı Federatsııasy Úkimetiniń tóraǵasy Mıhaıl Mıshýstınmen kezdesti.