Reseı Dýmasy balalar taýaryna 10% QQS qoldanýdy rastaý tártibin qoldady
ASTANA. KAZINFORM – Reseı Memlekettik dýmasy balalar taýarlaryn satý kezinde qosylǵan qun salyǵynyń (QQS) 10% mólsherlemesin qoldaný quqyǵyn rastaý tártibin naqtylaıtyn zań jobasyn birinshi oqylymda qabyldady, dep habarlaıdy TASS.
Qujatty Reseı úkimeti ázirlegen.
Qazirgi qoldanystaǵy Salyq kodeksine sáıkes, balalarǵa arnalǵan taýarlardyń arnaıy tizimi bar jáne olardy satý kezinde QQS 10% mólsherlememen esepteledi. Alaıda zańda bul taýarlardyń shynymen balalarǵa arnalǵanyn dáleldeıtin qujattardyń naqty tizimi kórsetilmegen. Sonyń saldarynan salyq tóleýshiler men salyq organdary arasynda daýlar týyndap, tómendetilgen mólsherlemeni qoldaný máselesi jıi talasqa aınalyp kelgen.
Jańa zań jobasyna sáıkes, balalar taýarlaryna 10% QQS qoldaný úshin salyq organyna ónimniń balalarǵa arnalǵanyn rastaıtyn reseılik sáıkestik sertıfıkaty nemese Eýrazııalyq ekonomıkalyq odaq talaptaryna saı sáıkestik deklaratsııasy usynylýy tıis.
Reseı úkimetiniń túsindirmesinde bul ózgeris taýardy balalarǵa arnalǵan ónim retinde taný kezinde ekiushty jaǵdaılardy boldyrmaýǵa jáne QQS-tyń jeńildetilgen mólsherlemesin qoldaný tártibin naqtylaýǵa múmkindik beretini aıtylǵan.
Aıta keteıik, buǵan deıin Reseıde Labubu oıynshyqtarynan ýly zat tabylǵany habarlandy.
