Reseı dızel otynyn eksporttaýǵa salynǵan tyıymdy uzartty
ASTANA. KAZINFORM — Reseı úkimeti dızel jáne keme otynyn, sondaı-aq gazoıldi tikeleı óndirýshilerdiń eksporttaýyna salynǵan ýaqytsha tyıymdy 2027 jylǵy 31 qańtarǵa deıin uzartty. Bul týraly Kazinform agenttigi TASS-qa silteme jasap habarlady.
— Reseı aýmaǵynan tikeleı óndirýshiler eksporttaıtyn dızel jáne keme otynyn, sondaı-aq gazoıldi shetelge shyǵarýǵa salynǵan tyıymdy 2027 jylǵy 31 qańtardy qosa alǵanǵa deıin uzartý týraly qaýlyǵa qol qoıyldy. Bul sheshim ishki janarmaı naryǵyndaǵy turaqtylyqty saqtaý maqsatynda qabyldandy, — delingen habarlamada.
Reseıde otyn eksportyna jalpy tyıym 2027 jylǵy 31 qańtarǵa deıin kúshinde bolady. Al dızel jáne keme otynyn, sondaı-aq gazoıldi tikeleı óndirýshilerdiń shetelge shyǵarýyna qoıylǵan shekteý 2026 jylǵy 31 qazanǵa deıin belgilengen edi.
30 qazanda Reseı premer-mınıstriniń orynbasary Aleksandr Novak dızel otynyn eksporttaýǵa salynǵan tyıymdy uzartý kezinde «burynǵydaı álemdik naryqqa jetkizýge qatysty jekelegen erekshelikter qarastyrylatynyn» málimdegen edi.
Bıyl 30 qyrkúıekte Vladımır Pýtın jeke tulǵalardyń Eýrazııalyq ekonomıkalyq odaq elderine, sondaı-aq Ázerbaıjan, Tájikstan jáne Ózbekstanǵa 1 mıllıon rýblden asatyn qolma-qol aqshany áketýine tyıym salatyn jarlyqqa qol qoıǵan edi.
Eske salaıyq, buǵǵan deıin AQSh prezıdenti Donald Tramp Reseı basshysy Vladımır Pýtınmen telefon arqyly sóıleskennen keıin reseılik dızel otynyn AQSh pen álemdik naryqqa jetkizý jóninde kelisim jasalǵanyn málimdegen edi.
