Reseı depýtaty Qazaq-qyrǵyz shekarasyndaǵy ahýalǵa pikir bildirdi
«Reseı Qazaqstannyń jáne atalǵan protseske ózge de qatysýshylardyń ustanymyn qoldaıdy. Bizderdiń aramyzda ádil, ashyq jáne seriktestik qarym-qatynas bolýy tıis. Tek sonda ǵana biz utysqa shyǵamyz. Sonda ǵana bizdiń odaq qarqyndy damıtyn bolady jáne atalǵan protseske qatysýshy memleketterdiń ǵana emes, sonymen birge ShYU, BRIKS jáne ózge de elderdiń basymdyqty ekonomıkasyna qol jetkiziletin bolady. Biz syrtqy, «sur» syzbalarǵa táýeldi bolmaýymyz qajet», - dedi RF Federaldy jınalysy Memlekettik dýmasynyń TMD, eýrazııalyq ıntegratsııa jáne otandastarmen baılanys isteri komıteti tóraǵasynyń orynbasary Vıktor Vodolatskıı BAQ ókilderine bergen suhbatynda.
Onyń aıtýynsha, egerde «sur» syzba jumys istese, onda Eýrazııalyq ekonomıkalyq odaqtyń 2018 jyldyń 1 qańtarynan kúshine enýi tıis jańa Keden kodeksine senim bolmaıdy.
«Bizdiń búgingi mindetimiz, ony barynsha shekteý. Atap ótkenimdeı, biz ádil ári senim negizinde jumys isteımiz. Eger tym bolmaǵanda bir tarap bul baǵytta azdaǵan «tentektik» kórsete bastasa, onda shekarada oryn alǵan jáne oryn alyp jatqan teris sátterdi birshama tómendetýge baǵyttalǵan repressıvti sharalar qoldanylatyn bolady. RF-ǵa qarsy sanktsııalar engizilgen kezde tek Qyrǵyzstan-Qazaqstan shekarasynda ǵana emes, sonymen birge Reseı men Belarýs shekarasynda da oryn alǵan jaıttardy kórdik. Sol kezde Belarýsta ómiri shyǵarylmaǵan ónimder sol eldiń brendimen paıda bolǵan edi», - dedi Vodolatskıı.
