Reseı bir aı boıy BUU Qaýipsizdik Keńesine tóraǵa bolady
ASTANA. KAZINFORM - BUU Qaýipsizdik keńesine tóraǵalyq bir aıǵa Reseıge ótti. Sońǵy ret Reseı Federatsııasy búkilálemdik uıymnyń negizgi qurylymynyń jumysyn 2023 jyldyń sáýirinde úılestirgen bolatyn, dep habarlaıdy TASS aqparat agenttigi.
Reseı bastaǵan Qaýipsizdik keńesiniń birinshi otyrysy dúısenbi kúni Nıý-Iork ýaqytymen tańerteń ótedi. Onda Qaýipsizdik keńesiniń aldaǵy aıǵa arnalǵan jumys baǵdarlamasy bekitiledi.
Odan keıin Reseı Federatsııasynyń Turaqty ókili Vasılıı Nebenzıa baspasóz máslıhatyn, keıin BUU Bas Assambleıasyna múshe memleketter úshin jabyq brıfıng ótkizedi.
Reseı tóraǵalyǵynyń ortalyq is-sharalary aıdyń ortasynda ótedi dep shamalanyp otyr jáne olar neǵurlym ádil, demokratııalyq jáne turaqty álemdik tártipti qurýǵa, Taıaý Shyǵystaǵy janjaldy retteýge, sondaı-aq BUU-nyń UQShU, TMD jáne Shanhaı yntymaqtastyq uıymymen yntymaqtastyqqa arnalǵan.
Buǵan deıin Reseı Syrtqy ister mınıstri Sergeı Lavrov málimdegendeı, sońǵy taqyryp qoldaý taýyp, osy otyrysqa UQShU Bas hatshysy Imanǵalı Tasmaǵambetov sóz sóıleıdi.
Jalpy alǵanda, bir aıdyń ishinde BUU Qaýipsizdik Keńesi jıyrmaǵa jýyq ashyq otyrys pen jabyq konsýltatsııa ótkizedi.
BUU Qaýipsizdik Keńesi 15 músheden turady, onyń ishinde bes turaqty múshe – Ulybrıtanııa, Qytaı, Reseı, AQSh jáne Frantsııa. Beseýiniń árqaısysynyń veto quqyǵy bar. BUU Qaýipsizdik Keńesiniń on ýaqytsha múshesi – Aljır, Gaıana, Malta, Mozambık, Koreıa Respýblıkasy, Slovenııa, Serra-Leone, Shveıtsarııa, Ekvador jáne Japonııa. Dúnıejúzilik uıymnyń Jarǵysyna sáıkes, Qaýipsizdik Keńesi beıbitshilik pen halyqaralyq qaýipsizdikti saqtaýǵa jaýapty jáne BUU-ǵa múshe barlyq elder onyń sheshimderine baǵynýǵa mindetti.
Qaýipsizdik Keńesinde usynylǵan memleketter óz jumysyn aǵylshyn tiliniń alfavıt tártibi boıynsha kezekpen júrgizedi. Eldiń Qaýipsizdik Keńesine tóraǵalyǵy bir kúntizbelik aıǵa sozylady. Maýsym aıynda bul fýnktsııalardy Koreıa Respýblıkasy atqardy, al tamyzda Serra-Leone Qaýipsizdik keńesiniń jumysyn basqarady.
Kazinform úshin arnaıy TASS seriktes agenttigi usynǵan.
