Reseı biz úshin negizgi ekonomıkalyq seriktes sanalady - Palymbetov
«Reseı biz úshin negizgi ekonomıkalyq seriktes sanalady. Reseı bıznes-ombýdsmeni ınstıtýtymen birlese otyryp aýqymdy jumys atqaryldy. Jalpy, Qazaqstanda bıznes-ombýdsmen negizsiz qurylǵan joq. Eń aldymen Ulttyq kásipkerler palatasy qurylyp, otandyq kásipkerlerdiń basyn qostyp. 2013 jyly «Ulttyq kásipkerler palatasy týraly» zań qabyldandy. Onda palata qyzmeti naqty jazylǵan. 2016 jyly Kásipkerlik kodeksi kúshine endi. Bul kodekste Qazaqstan bıznes-ombýdsmenine jeke bir bólim arnaldy», - dedi ol.
Óz kezeginde Reseı Federatsııasynyń Prezıdenti janyndaǵy kásipkerlerdiń quqyqtaryn qorǵaý jónindegi ýákil Borıs Tıtov eki el arasyndaǵy maqsat pen mindet ushtasyp jatqandyǵyn basa aıtty.
«Eki memlekettiń aldynda uqsas máseleler men mindetter tur. Onyń ishinde el ekonomıkasynda shaǵyn jáne orta kásipkerliktiń úlesin arttyrý, jeke bıznestiń damýy úshin jaǵdaıdy jaqsartý, ákimshilik baqylaýdy azaıtý syndy máseleler bar. Qazaqstanda da Reseıdegideı osy baǵyttaǵy kúreste negizgi seriktes Bas prokýratýra eken. Qıyndyqtar da bar bolǵanymen Qazaqstan bıligi ákimshilik kedergilerdi joıýda naqty sheshimder qabyldap otyr», - dedi ol.
Aıta keteıik, búgin elordada Astanada Qazaqstan men Reseı bıznes-ombýdsmenderiniń І forýmy ótti. Sharaǵa eki eldiń bıznes-ombýdsmenderi, «Atameken» QR UKP ókilderi men eki eldiń iskerlik delegatsııasy qatysty.