Reseı bıatlon boıynsha Álem kýbogynan shettetildi
ASTANA. QazAqparat - Halyqaralyq bıatlonshylar odaǵynyń (IBU) Atqarýshy komıteti 2018-19 jylǵy Álem kýbogynyń kestesine Reseıde ótetin kezeńdi kirgizbeýge sheshim qabyldady.
Bul týraly odaqtyń saıtynda habarlandy.
Álem kýbogynyń kúntizbesi toǵyz kezeńnen turady, onyń birinshisi Slovenııanyń Poklıýk qalasynda 2018 jyldyń 3-9 jeltoqsany aralyǵynda, al sońǵysy 2019 jylǵy 18-24 naýryz aralyǵynda Norvegııa astanasy Osloda ótetin boldy. O basta týrnırdiń sońǵy kezeńi 2019 jylǵy 25 naýryzda Túmende qorytyndylanatyn bolyp josparlanǵan edi.
Eske sala ketsek, 2016 jyldyń jeltoqsanynda WADA otyzdan astam reseılik bıatlonshy tyıym salynǵan zattardy paıdalandy dep aıyptaǵan edi. Endi 2017 jyldyń naýryzynda «WADA kodeksine sáıkes emes» dep tanylǵan Reseı Túmende ótýi tıis 2021 jylǵy álem birinshiligin qabyldaý quqyǵynan aıyryldy.
Foto: Andreı Anosov/SBR/TASS
