Reseı-Belarýs shekarasynda qazaqstandyq tasymaldaýshylarǵa qoıylǵan tosqaýyl alyndy
ASTANA. KAZINFORM — 2024 jyldyń 8 qańtarynan bastap Reseı FQQ Shekara qyzmeti sheteldik tasymaldaýshylarǵa, sonyń ishinde qazaqstandyq tasymaldaýshylarǵa Reseı-Belarýs shekarasyn kesip ótýge tolyq tyıym salǵan bolatyn, dep habarlaıdy QR Saýda jáne ıntegratsııa mınıstrligi.
Sáıkesinshe, Eýropadan Qazaqstanǵa Belarýs Respýblıkasynyń aýmaǵy arqyly jáne oǵan qarsy baǵyttaǵy barlyq tranzıttik joldar jabyldy.
— Qazaqstan men Reseı Úkimetteri arasynda jedel kelissózder júrgizilip, nátıjesinde 2024 jylǵy 12 qańtarda qazaqstandyq tasymaldaýshylar úshin «Ezerışe-Nevel» (Lobok) shekara ótkeli ashyldy. Sonymen qatar, Qazaqstan tarapy Eýrazııalyq ekonomıkalyq komıssııaǵa bul máseleni tosqaýyl retinde qarastyrý týraly úndeý joldady. Eýrazııalyq ekonomıkalyq komıssııa alańynda qazaqstandyq sarapshylar Reseı tarapynyń áreketi EAEO týraly sharttyń qozǵalys erkindigin qamtamasyz etý bóligindegi erejelerine sáıkes kelmeıtinin dáleldedi, bul Eýrazııalyq ekonomıkalyq komıssııanyń tosqaýyl belgileriniń bolýy týraly qorytyndysymen de rastaldy. Konsýltatsııalardyń qorytyndysy boıynsha reseılik tarap Reseı Federatsııasy men Belarýs Respýblıkasy úkimetteri arasyndaǵy vızalardy ózara taný týraly kelisim aıasynda shekteýdi alyp tastaý týraly sheshim qabyldady, — delingen mınıstrlik habarlamasynda.
Aıta keteıik, bul Kelisim shetel azamattary men azamattyǵy joq adamdardyń Reseı-Belarýs shekarasy arqyly, onyń ishinde buryn tek Reseı men Belarýs azamattary úshin ashyq bolǵan jer ýchaskesin kesip ótý tártibin retteıdi.
— Osylaısha, búgingi tańda qazaqstandyq tasymaldaýshylardyń Reseı-Belarýs shekarasynan ótýi úshin 6 baqylaý-ótkizý pýnkti ashyq (ıÝhovıchı — Dolostsy, Ezerışe — Nevel, Lıozno — Krýglovka, Redkı — Krasnaıa Gorka, Zvenchatka — Dýbovıchka, Selışe — Novozybkov). Bıyl 25 aqpanda Eýrazııalyq ekonomıkalyq komıssııa reseılik tarap atalǵan Kelisimniń 2025 jylǵy 11 qańtarda kúshine enýine baılanysty aǵymdaǵy shekteýdi alyp tastaý týraly aqparat jibergenin resmı túrde habarlady. Búgingi tańda qazaqstandyq bıznes osy alty baǵyt boıynsha ótkizý pýnktterinen emin-erkin óte alady, — dep atap ótti vedomstvo.
Osydan buryn halyqaralyq júk tasymaldaýshylar úshin jańa tetik engiziletini habarlandy.