Reseı «Baıqońyrdy» tastap kete qalatyndaı jaǵdaıǵa Qazaqstan qazirden daıyn bolýy tıis - T. Musabaev

Búgin QR Parlamenti Senatynyń jalpy otyrysynda «Qazaqstan Respýblıkasy men RF arasyndaǵy «Baıqońyr» keshenin tıimdi paıdalaný jónindegi yntymaqtastyqty damytý týraly kelisimdi ratıfıkatsııalaý týraly» zań jobasyn talqylaý barysynda QR Ulttyq ǵarysh agenttiginiń tóraǵasy Talǵat Musabaev osylaı málim etti, dep habarlaıdy QazAqparat.

«2007 jyly qarashanyń 6-synda RF Prezıdentiniń Reseı aýmaǵynan jańa ǵarysh aılaǵyn salý týraly jarlyǵy shyqqan bolatyn. Bul «Vostochnyı» dep atalatyn ǵarysh aılaǵy Reseıdiń Amýr oblysynda ornalasady. Reseılikter osy ǵarysh aılaǵynan tipti 2015 jyldyń ózinde-aq adam basqaratyn kemesin ushyrýǵa ázirlenip jatqanyn málimdegen edi. Árıne, bul naqty shyndyqqa saı málimet emes. Degenmen de, «Vostochnyı» aılaǵyn júzege asyrýǵa Reseı beldi bekem býyp kiriskeni anyq. Osy turǵydan alǵanda, Reseı bizdiń «Baıqońyr» keshenin qansha jylǵa deıin paıdalanady degen oı mazalaıtyny ras. Toqtala ketetin jaıt, dál búgingi kúnderi Reseı bizdiń «Baıqońyrsyz» eshteńe jasaı almaıdy. Alaıda, Reseı «Baıqońyrdy» tastap kete qalatyndaı jaǵdaıǵa biz daıyn bolýǵa tıispiz, ondaı daıyndyqqa kesh qalýǵa bolmaıdy», dedi T. Musabaev.

Onyń aıtýynsha, dál qazirgi kezeńde Qazaqstan naqty áreketterge baryp, «Baıqońyr» ǵarysh aılaǵyna tikeleı mamandarymen kirigip, aralaspasa, aldaǵy ýaqytta teńdessiz ǵarysh aılaǵyn ıgerý ýystan shyǵýy da múmkin. «Baıqońyr» - mıllıondaǵan tonna metal qaldyqtaryna, kezinde teńdessiz sanalǵan myńdaǵan qondyrǵylar qoqysyna aınalmaýy tıis. Biz ýaqytyly Reseımen teńdeı dárejede «Baıqońyrdy» damytýǵa aralasyp, jyl saıyn óz áleýetimizdi arttyra túsýge tıispiz. Bizdiń boljamdy esepterimiz boıynsha, barlyq ǵaryshtyq keshen resýrstarynyń taýsylýyna shamamen 10-12 jyldaı ǵana qaldy. Sondyqtan da, Qazaqstan búgingi kúni áreketke kóshpese, aldaǵy ýaqytta «barmaǵyn shaınap» qalýy yqtımal», dedi T. Musabaev.