Reseı «Baıqońyr» aılaǵyndaǵy birqatar nysandardy jalǵa alýdan shyǵarýǵa múddeli - T. Musabaev
Jalpy otyrysta «2004 jylǵy 22 jeltoqsandaǵy Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy «Baıqońyr» ǵarysh aılaǵynda «Báıterek» ǵarysh zymyran keshenin qurý týraly kelisimge ózgerister engizý týraly hattamany ratıfıkatsııalaý týraly» zań jobasy maquldanǵan bolatyn.
Zań jobasyn talqylaý barysynda depýtat Raýan Shaekın buqaralyq aqparat quraldarynda «Baıqońyr» ǵarysh aılaǵyna jalǵa beriletin múlikter qysqartylatyny jazylǵanyn tilge tıek etip, bunyń nátıjesinde arendalyq tólem azaıatyndyǵy týraly aqparatty da suraǵan edi.
«Shyndyǵynda, 1994 jyly eki memleket basshylary «Baıqońyr» úshin arendalyq tólem jylyna 115 mln. dollar shamasynda bekitilgen. Bul búginge deıin saqtalyp keledi. Sonymen qatar, Reseı tarapy «Baıqońyr» aılaǵynan myńdaǵan nysandardy arendadan shyǵarýǵa múddeli. Ondaı obektilerdiń basym bóligi eskirgen, olardy Qazaqstan tarapy da Reseı tarapy da keleshekte qoldanýǵa esh qyzyqpaıdy. Sondyqtan da, olar ondaı nysandardy arendalyq tólemnen shyǵarǵysy keledi. Alaıda, qazirge deıin Reseı tarapynan «Baıqońyr» ǵarysh aılaǵyn paıdalanǵany úshin jalǵa alý tólemin qysqartý týraly másele qoıylǵan emes», - dedi Investıtsııalar jáne damý mınıstrligi Aeroǵarysh komıtetiniń tóraǵasy Talǵat Musabaev.
