Reseı Bashar Asadty Sırııaǵa ekstradıtsııalaýdan bas tartty

ASTANA. KAZINFORM – Reseı Damaskidegi jańa úkimettiń Reseıge qashyp ketken Bashar Asadty ekstradıtsııalaý týraly ótinishin qabyldaǵan joq, dep málimdedi Sırııanyń ýaqytsha prezıdenti Ahmed ash-Sharaa The New York Times basylymyna bergen suhbatynda. Bul týraly DW aqparat agenttigi habarlaıdy.

Reseı Sırııanyń jańa úkimetiniń Reseıge qashyp ketken prezıdenti Bashar Asadty ekstradıtsııalaý týraly ótinishin qabyldaǵan joq.

Bul ótinish Reseı bıligine qańtar aıynda jiberildi, dep habarlady Sırııanyń ýaqytsha prezıdenti jáne «Haııat Tahrır ash-Sham» (HTS) jıhadshylar tobynyń jetekshisi Ahmed ash-Sharaa sársenbi, 23 sáýirde The New York Times (NYT) gazetine bergen suhbatynda.

Bas tartýǵa qaramastan, Sırııanyń jańa ákimshiligi Reseımen qarym-qatynasty úzýge nıetti emes jáne «Sırııa bıligi Kremlmen kelissózderge ashyq», - dep jazdy NYT.

- Reseı – BUU Qaýipsizdik Keńesiniń turaqty múshesi. Sırııanyń qarýy tolyǵymen reseılik. Sırııa uzaq jyldar boıy súıengen azyq-túlik pen energııamen qamtamasyz etý boıynsha kóptegen kelisimder bar, dep málimdedi ash-Sharaa onyń úkimeti «Sırııanyń osy múddelerin eskeretinin» basa aıtyp.

Sırııadaǵy joıqyn azamattyq soǵys kezinde Máskeý Asad rejımin qoldaý maqsatynda elge ushaqtar, kemeler, ásker men áskerı keńesshiler jiberdi, dep eske saldy NYT.

- Ázirge biz basqa elderden negizinen Reseıde shyǵarylatyn sırııalyq qarýdy aýystyrý týraly eshqandaı usynys alǵan joqpyz, - dep qosty ash-Sharaa.

Ótken jyldyń sońynda Sırııanyń bılikten qýylǵan prezıdenti Bashar Asad elden armııa «sońǵy pozıtsııalaryn berip» jáne «barlyq memlekettik ınstıtýt sal bolyp qalǵanda» ǵana ketkenin málimdedi.