Reseı barlyq elderdi Qazaqstan usynǵan terrorızmge qarsy kodekske qol qoıýǵa shaqyrdy
«BUU Bas Assambleıasynyń minberinde 2015 jyly sóılep turyp, Qazaqstan jáne Reseı Prezıdentteri Nursultan Nazarbaev pen Vladımır Pýtın terrorızmmen kúreste birlesken front qurý jáne barlyq memleketter halyqaralyq quqyqtar normalaryna sáıkes jumys atqara alatyndaı bastama tastaǵan bolatyn. Araǵa týra úsh jyl salyp halyqaralyq terrorızmniń qaýipterin eńserýge umtylatyn koalıtsııa qurýǵa kelisken 70 memleket atalmysh usynysty nazarǵa aldy», - delingen dıplomatııalyq vedomstvonyń habarlamasynda.
Mınıstrlikte atalyp ótkendeı, kodeks «halyqaralyq terrorızmge qarsy kúrestiń irgeli qaǵıdattaryn biriktirip qana qoımaı, árbir memleketti terror qaýpinen qutqara alady». «Qujat antıterror salasynda álemdik birlestikterdiń birlesken praktıkalyq baǵyttaryn aıqyndap bere alady».
Reseılik tarap «qujat avtory - qazaqstandyq seriktesterge, qujattyń daıyndalýyna úles qosqan barlyq memleketterge alǵysyn aıtady».
«Barlyq memleketterdi osy Kodekske qosylýǵa, sonymen qatar, BUU Jarǵysy bazasynda tanylǵan terrorızmniń qandaı da bir túri baıqalǵan jaǵdaıda osy qujat tártibin negizge alýǵa shaqyramyz», - delingen habarlamada.
Aıta ketsek, budan buryn QR Syrtqy ister mınıstri Qaırat Ábdirahmanov BUU Bas Assambleıasynyń 73-shi sessııasynda pikirtalasta sóılegen sózinde Terrorızmnen azat álemge qol jetkizý minez-qulyq kodeksine qol qoıǵan memleketterdiń bárine alǵys bildirgen bolatyn.
