Reseı bankteriniń Visa jáne Mastercard kartalary el ishinde ǵana jaramdy

MÁSKEÝ. TASS-QazAqparat – Reseıdiń barlyq bankteriniń Visa jáne Mastercard halyqaralyq tólem júıeleriniń kartalary RF-te jumys isteı beredi. Osy kartalarǵa baılanǵan shottaǵy qarajat tolyq saqtalady. Bul týraly Reseı Ortalyq banki málim etti, dep habarlaıdy QazAqparat TASS agenttigine silteme jasap.

«Reseı bankteri shyǵarǵan Visa jáne Mastercard halyqaralyq tólem júıeleriniń búkil kartalary olardyń qoldaný merzimi aıaqtalǵanǵa deıin Reseı aýmaǵynda qalypty rejımde jumys isteı beredi. Olar boıynsha operatsııalar el ishinde Tólem kartalarynyń ulttyq júıesinde júzege asyrylady jáne olarǵa sanktsııa yqpal etpeıdi. Osy kartalarǵa baılanǵan shottaǵy qarajat tolyq saqtalady jáne kez kelgen ýaqytta qoljetimdi», - dedi ortalyq bank.

Reseıdegi osy karta ıeleri bankomatta operatsııa júrgize alady, kartamen tólem jasaı alady, kartadan kartaǵa aqsha jibere alady.

Ortalyq bank Visa jáne Mastercard kartalary boıynsha transshekaralyq operatsııalar qoljetimsiz ekenin eskertti.