Reseı Banki negizgi mólsherlemeni taǵy da tómendetti
Reseı Banki dırektorlar keńesiniń 24 shildedegi otyrysynda negizgi mólsherlemeni jyldyq 14,25%-dan 14%-ǵa deıin tómendetý týraly sheshim qabyldady, dep habarlaıdy TASS.
Sarapshylar negizgi mólsherleme 14,25% deńgeıinde saqtalady dep boljaǵan edi.
Retteýshiniń habarlaýynsha, maýsym aıynda nesıeleý qarqyny azdap baıaýlaǵan. Sondaı-aq kásiporyndar bolashaqtaǵy suranys pen óndiris kólemine qatysty boljamdaryn aıtarlyqtaı tómendetken.
— Sonymen qatar jekelegen salalardaǵy óndiris kóleminiń ýaqytsha tómendeýi, sondaı-aq sáýir aıyndaǵy boljammen salystyrǵanda aldaǵy úsh jylǵa arnalǵan bıýdjettik saıasattyń kóbirek yntalandyrý sıpatynda bolýy negizgi mólsherlemeni birtindep tómendetýdi talap etedi, — delingen Reseı Bankiniń baspasóz habarlamasynda.
Bul — Reseı Banki negizgi mólsherlemeni qatarynan onynshy ret tómendetip otyr. Buǵan deıin, maýsym aıynda, mólsherleme 25 bazıstik tarmaqqa qysqartylyp, 14,25%-ǵa deıin tómendetilgen edi.
Negizgi mólsherlemege qatysty kelesi otyrys 11 qyrkúıekke josparlanǵan.
Reseı Banki aldaǵy sheshimder ınflıatsııanyń dınamıkasy, ınflıatsııalyq boljamdar jáne ishki-syrtqy ekonomıkalyq jaǵdaılardaǵy táýekelderdi baǵalaý negizinde qabyldanatynyn málimdedi.
Eske salaıyq, buǵan deıin Reseı janarmaı naryǵynda jańa salyq tetikterin engizetinin habarlaǵanbyz.
