Reseı Banki negizgi mólsherlemeni qatarynan tórtinshi ret tómendetti

ASTANA.KAZINFORM — Eldiń negizgi qarjy retteýshisi negizgi mólsherlemeni 50 bazıstik pýnktke, 17%-dan 16,5%-ǵa deıin tómendetti, dep habarlaıdy Kazinform agenttigi.

24 qazandaǵy otyrysynan keıin Reseı Bankiniń Dırektorlar keńesi negizgi mólsherlemeni 16,5%-ǵa deıin tómendetýge sheshim qabyldady. Bul osymen — tórtinshi tómendetý.

— Reseı Banki ınflıatsııany maqsatty deńgeıge qaıtarý úshin kredıt sharttaryn jetkilikti túrde qatań saqtaıdy. Bazalyq stsenarııde bul 2026 jyly jylyna 13,0-15,0% aralyǵyndaǵy ortasha negizgi mólsherlemeni qamtıdy jáne uzaqmerzimdi qatań kredıt saıasatyn bildiredi, - delingen Ortalyq bank málimdemesinde.

Baspasóz habarlamasynda atalyp ótkendeı, negizgi mólsherleme týraly qosymsha sheshimder ınflıatsııa baıaýlaýynyń turaqtylyǵyna jáne ınflıatsııalyq boljam dınamıkasyna baılanysty qabyldanady.

Eldiń negizgi qarjy retteýshisiniń boljamyna sáıkes, aǵymdaǵy aqsha-nesıe saıasatyn eskere otyryp, jyldyq ınflıatsııa 2026 jyly 4,0-5,0%-ǵa deıin tómendeıdi. 2027 jyly jáne odan keıingi jyldary jyldyq ınflıatsııa maqsatty deńgeıde qalady.

Reseıdegi jyldyq ınflıatsııa, 20 qazandaǵy baǵalaý boıynsha, 8,2%-dy qurady jáne 2025 jyldyń sońyna qaraı 6,5-7,0% aralyǵynda bolady dep boljandy.

Reseı Bankiniń málimeti boıynsha, aǵymdaǵy ınflıatsııalyq qysym 2025 jyldyń sońy men 2026 jyldyń basynda birqatar faktorlarǵa, sonyń ishinde baǵany túzetýge jáne ınflıatsııalyq boljamdardyń aldaǵy QQS ósýine reaktsııasyna baılanysty ýaqytsha artady.

Buǵan deıin Reseı banki negizgi mólsherlemeni 18%-ǵa deıin tómendetkenin jazǵanbyz.