Reseı banki negizgi mólsherlemeni 18%-ǵa deıin tómendetti

ASTANA. KAZINFORM — Reseı banki negizgi paıyzdyq mólsherlemeni qatarynan ekinshi ret tómendetti. Bul joly birden 2 paıyzdyq tarmaqqa — 18%-ǵa deıin azaıtyldy, dep habarlaıdy TASS.

Bul sheshim ınflıatsııalyq qysymnyń kútkennen de jyldamyraq tómendeýi jáne ishki suranys ósiminiń baıaýlaýy sebepti qabyldanǵan. Bul týraly Qarjy retteýshisiniń dırektorlar keńesi otyrysynyń qorytyndysy boıynsha jarııalanǵan baspasóz relızinde aıtylǵan.

— Dırektorlar keńesi negizgi mólsherlemeni tómendetý týraly sheshim qabyldady, — delingen Reseı bankiniń málimdemesinde. 

Jyldyq mólsherleme 200 bazıstik tarmaqqa qysqaryp, 18% deńgeıinde bekitildi. Retteýshiniń aıtýynsha, qazirgi ınflıatsııalyq qysym, sonyń ishinde turaqty ınflıatsııa, burynǵy boljamdarǵa qaraǵanda jyldam tómendep jatyr.

Ekonomıka teńgerimdi ósý traektorııasyna birtindep oralyp keledi. Osyǵan baılanysty Reseı banki ınflıatsııany 2026 jyly maqsatty deńgeıge qaıtarý úshin aqsha-nesıe sharttaryn qatań ustaýǵa nıetti ekenin málimdedi.

Retteýshi bıýdjettik saıasattyń jarııalanǵan parametrlerin negizge alyp otyrǵanyn atap ótti. Bul saıasattyń 2025 jyly qalypqa kelýi ınflıatsııany tómendetýge yqpal etedi. Al bıýdjettik saıasat parametrleriniń ózgerýi aqsha-nesıe saıasatyn qaıta qaraýdy qajet etýi múmkin.

Negizgi stsenarııge sáıkes, 2025 jyly negizgi mólsherlemeniń ortasha máni 18,8–19,6% deńgeıinde, al 2026 jyly 12–13% deńgeıinde bolady dep boljanyp otyr. Bul qatań aqsha-nesıe saıasatynyń uzaq ýaqytqa jalǵasatynyn kórsetedi. Reseı banki negizgi mólsherlemege qatysty aldaǵy sheshimder ınflıatsııanyń baıaýlaý turaqtylyǵyna jáne ınflıatsııalyq kútýlerdiń dınamıkasyna baılanysty bolatynyn málimdedi.

Sonymen qatar, 21 shildedegi baǵalaý boıynsha jyldyq ınflıatsııa 9,2%-dy qurady. Shilde aıynda tutyný baǵalary ındeksiniń aılyq ósimi ýaqytsha ulǵaıady dep kútilip otyr, sebebi kommýnaldyq tarıfterge eleýli ındeksatsııa júrgizilgen.

Budan buryn Mońǵolııada qoljetimdi baspana úshin arnaıy bank qurylatyny aıtyldy.