Reseı banki negizgi mólsherlemeni 14,25%-ǵa deıin tómendetti
MÁSKEÝ.KAZINFORM - Reseı banki dırektorlar keńesiniń kezekti otyrysynyń qorytyndysy boıynsha negizgi mólsherlemeni 0,25 paıyzdyq tarmaqqa tómendetip, 14,25% deńgeıinde belgiledi, dep habarlaıdy agenttik tilshisi.
Naryq qatysýshylarynyń basym bóligi mólsherleme 14%-ǵa deıin tómendeıdi dep kútken bolatyn.
Habarlamada jyldyń basyndaǵy ýaqytsha baıaýlaýdan keıin ekonomıkalyq belsendiliktiń qalypty qarqynmen ósip jatqany atap ótilgen. Retteýshiniń baǵalaýynsha, turaqty ınflıatsııalyq qysym birshama báseńdegenimen, jyldyq mánde áli de 4–5% aralyǵynda saqtalyp otyr.
Ortalyq bank sońǵy aılarda nesıeleý ósiminiń jedeldegenine de nazar aýdardy. Sonymen qatar, aldaǵy úsh jyldaǵy bıýdjet saıasaty buǵan deıin boljanǵannan da yntalandyrýshy sıpatqa ıe bolady. Retteýshiniń pikirinshe, bul sáýir aıyndaǵy bazalyq stsenarııde kózdelgen deńgeımen salystyrǵanda negizgi mólsherlemeniń joǵaryraq traektorııasyn talap etýi múmkin.
Reseı banki kelesi otyrystarda mólsherlemeni odan ári tómendetýdiń oryndylyǵyn ınflıatsııanyń baıaýlaý turaqtylyǵyn, ınflıatsııalyq kútýler dınamıkasyn, sondaı-aq ishki jáne syrtqy ekonomıkalyq jaǵdaılarǵa baılanysty táýekelderdi eskere otyryp baǵalaıtynyn málimdedi.
Retteýshiniń boljamyna sáıkes, júrgizilip jatqan aqsha-nesıe saıasatynyń nátıjesinde jyldyq ınflıatsııa 2026 jyly 4,5–5,5%-ǵa deıin tómendeıdi. Turaqty ınflıatsııa 2026 jyldyń ekinshi jartysynda 4% maqsatty deńgeıine jaqyndaıdy. Al 2027 jyly jáne odan keıingi kezeńde ınflıatsııa osy maqsatty deńgeıde saqtalady dep kútilýde.
Reseı bankiniń negizgi mólsherleme máselesi boıynsha kelesi otyrysy 24 shildege josparlanǵan.
Buǵan deıin Qazaqstan Ulttyq bankiniń tóraǵasy Tımýr Súleımenov Qazaqstandaǵy ınflıatsııanyń baıaýlaýy týraly pikir bildirip, onyń retteýshiniń aldaǵy aqsha-nesıe saıasatyna qalaı áser etetinin aıtqan bolatyn.
