Reseı balalarǵa arnalǵan qantty sýsyndar jarnamasyna tyıym salýy múmkin

ASTANA. KAZINFORM – Balalardyń densaýlyǵyna zııan keltiretin qant qosylǵan sýsyndardyń jarnamasyna tyıym salý qajet. Sonymen qatar, mundaı tátti gazdalǵan sýsyndar dúkenderde qyzyl tústi baǵa belgilerimen bólek sórelerde ornalasýy tıis. Bul týraly TASS agenttigine Reseı Qoǵamdyq palatasy hatshysynyń orynbasary Vladıslav Grıb málimdedi.

– Zııandy faktorlardy eskere otyryp, balalarǵa arnalǵan qantty sýsyndardyń jarnamasyna tyıym salýdy usynamyn, – dedi ol.

Onyń aıtýynsha, mundaı sýsyndardyń qaptamalarynda densaýlyqqa zııany týraly iri ári kózge birden túsetin eskertpe jazýlar bolýy kerek.

– Dúkenderde bul ónimder bólek sórelerde, qyzyl tústi baǵalarmen jáne shekteýli tutynýǵa usynylatyny jóninde eskertpemen turýy tıis, – dedi Vladıslav Grıb.

Ol dárigerlerdiń qant qosylǵan sýsyndardyń zııany jóninde kópten beri aıtyp kele jatqanyn atap ótti. Onyń ishinde balalarǵa jıi usynylatyn tátti gazdalǵan sýsyndar, qaptamadaǵy shyryndar, nektarlar men morstar bar.

– Qant dıabeti, semizdik, tisjegi, sondaı-aq mundaı sýsyndarǵa táýeldilik áseri – memleket nazar aýdarýy tıis ózekti máseleler. Dárigerler bul jóninde burynnan dabyl qaǵyp keledi, – dep atap ótti ol.

Aıta keteıik, buǵan deıin Reseı memlekettik Dýmasynda plenarlyq otyrystardy fotoǵa túsirýge tyıym salyndy.