Reseı ázirge Ýkraınaǵa qarjylaı kómektiń ekinshi úlesin aýdarýǵa daıyn emes

ASTANA. QazAqparat - Sońǵy birneshe aıdan beri Reseı men Ýkraına prezıdentteri birneshe márte kezdesti. Reseı tarapy ázirge Ýkraınaǵa qarjylaı kómektiń ekinshi transhyn aýdarǵan joq.

Reseılik qarjy mınıstrliginiń basshysy Anton Sılýanovtyń sózine qaraǵanda, Máskeý Kıev jaǵynyń reseılik gazdyń jetkizilimine tólemderdiń oryndalýy boıynsha mindetterdi júzege asyrýyn kútip otyr.

«Biz gaz úshin ýkraındyq taraptyń esep aıyrysý talaptaryn oryndaýyn kútýdemiz. Ondaǵy qarjy somasy az emes. Qańtar aıaǵynda tólem jasalýy tıis edi, alaıda osy jumystar atqarylǵan joq. Bul turǵyda taraptardyń osy mindetterdi birge oryndaǵany durys bolar edi»,-dedi mınıstr.

Bastapqy kelisim boıynsha Ýkraınaǵa baǵyttalatyn 15 mlrd. dollar kólemindegi qarjylaı kómekti bıyldyń mamyryna deıin tolyqtaı aýdarý kózdelgen bolatyn.

Sheteldik BAQ-tyń málimetinshe, aqpannyń basyndaǵy jaǵdaı boıynsha Ýkraınanyń gazǵa degen qaryzy 3,4 mlrd. dollarǵa jýyq qarjyny qurap otyr.