Reseı Ázerbaıjan arqyly Armenııaǵa temirjol tranzıtin iske qosýdy josparlap otyr

ASTANA. KAZINFORM – Reseı Ázerbaıjan aýmaǵy arqyly Armenııaǵa taýarlardy temirjolmen tasymaldaýdy jolǵa qoıýdy josparlap otyr, dep habarlaıdy Kazinform agenttiginiń menshikti tilshisi.

Reseı Federatsııasy Premer-mınıstriniń orynbasary Alekseı Overchýktyń aıtýynsha, Reseı tarapy Armenııaǵa taýarlardy Ázerbaıjan arqyly temirjolmen jetkizýge qatysty uıymdastyrýshylyq máselelerdi qarastyryp jatyr.

— Ázerbaıjan tarapy Reseı ónimderin Armenııaǵa tranzıtpen ótkizý úshin óz temirjoldaryn paıdalanýǵa múmkindik bar ekenin rastady. Bul baǵytta oń ózgerister baıqalady. Qazir «Reseı temir joldary» kompanııasy óńirdegi áriptesterimen birlesip tasymaldyń uıymdastyrý máselelerin talqylaýda. Sondaı-aq Reseı Aýyl sharýashylyǵy mınıstrligine jańa logıstıkalyq baǵytty ıgerý tapsyryldy, — dedi Overchýk.

Buǵan deıin Ázerbaıjan Prezıdenti Qazaqstanǵa jasaǵan memlekettik sapary barysynda Armenııaǵa tranzıttik júk tasymalyna qoıylǵan shekteýlerdiń alynǵanyn habarlaǵan bolatyn.

Osy jańa baǵyt boıynsha alǵashqy tasymaldanǵan júk qazaqstandyq bıdaı boldy.

Osydan keıin Armenııa Premer-mınıstri Nıkol Pashınıan tranzıt máselesin retteýge yqpal etkeni úshin Qazaqstan Prezıdenti Qasym-Jomart Toqaevqa alǵys bildirdi.