Reseı azamatyna Qazaqstanda esirtki satqany úshin ómir boıy bas bostandyǵynan aıyrý jazasy kesilmek
ASTANA. 2 qazan. QazAqparat - QR ІІM esirtki bıznesine qarsy kúres komıtetiniń qyzmetkerleri Ujymdyq qaýipsizdik týraly shart uıymynyń «Kanal» jergilikti esirtkige qarsy kúres operatsııasyna múshe-memleketter sheńberinde kezekti Reseıden Qazaqstanǵa sıntetıkalyq esirtkiler jetkizý jolynyń jumysyn toqtatty.
Bul týraly búgin elimizdiń quqyqqorǵaý vedomstvosynyń baspasóz qyzmetinen habarlady.
Petropavl qalasynyń «Sova» dámhanasynda jedel-izdestirý jáne arnaıy is-sharalar keshenin júrgizý barysynda 23 jastaǵy Reseı Federatsııasynyń azamaty ustaldy. Odan bir jarym myń dozadan astam amfetamındik topqa jatatyn sıntetıkalyq esirtki tárkilendi. Esirtkini jalpy jeke satý baǵasy 10 mıllıonnan astam teńgeni quraıdy.
Ustalǵan azamat Omby qalasynda turady, ózen sharýashylyǵynda mehanık bolyp jumys isteıdi, erejesiz kúres boıynsha sport sheberi. Reseı aýmaǵynda kisi óltirgeni úshin sottalǵan.
Polıtseıler olardyń esirtkini joıylǵan kanal arqyly Shý-Býrabaı kýrorttyq aımaǵy jáne Astana qalasynyń betke ustar kóńil kóterý mekemelerine jetkizbek bolǵanyn habarlady.
«Sońǵy ýaqytta qymbat baǵaly sıntetıkalyq esirtkiler qaltaly demalys mekemelerine kelýshiler arasynda, sondaı-aq «altyn jastar» sııaqty ortalarda keńinen jasyryn suranysqa ıe», - dep naqtylady baspasóz qyzmetinde.
QR Qylmystyq kodeksiniń 259-baby 3-bólimi (zańsyz esirtki aınalymy) jáne 250-baby (esirtki kontrabandasy) boıynsha qylmystyq is qozǵaldy. Qazirgi ýaqytta kúdikti kúzetke alyndy.
«Atalǵan qylmystardy jasaǵany úshin Qazaqstannyń qoldanystaǵy zańnamasyna sáıkes, kúdiktige on jyldan jıyrma jylǵa deıingi merzimde bas bostandyǵynan aıyrý túrinde nemese múlkin tárkileýmen ómir boıy bas bostandyǵynan aıyrý jazasy kesilmek», - dep aıtylǵan habarlamada.
