Reseı azamaty Qazaqstannan 1 tonnadan astam araq ónimderin zańsyz alyp ketpek bolǵan
ASTANA. QazAqparat - Jánibek shekara otrıadyna qarasty «Shońǵaı» zastavasynyń shekarashylary 190 jáshikke salynǵan 1 tonnadan astam (1150 lıtrden astam) zańsyz araq ónimderimen 51 jastaǵy Reseı Federatsııasynyń azamatyn ustady.
«Ustalǵan azamat «ÝAZ» kóligin minip, elimizden Reseı jerine qaraı bet túzep barady eken. Teksere kelgende, júkke qajetti ilestirme qujattary bolmaı shyqty», dep habarlaıdy QR UQK ShQ baspasóz qyzmetinen.
Sondaı-aq Petropavl shekara otrıadyna qarasty «Mamlıýtka» temirjoldyq ótkizý-baqylaý beketiniń shekara narıady «Bishkek-Ekaterınbýrg» baǵytynda ketip bara jatqan jolaýshylar poıyzyn qaraý kezinde jolserikter kýpesindegi 3-shi sórede jatqan tósek-oryn salatyn qapshyqtar men qoraptan eshqandaı qujatsyz 4000 dana temeki ónimderin tapty. Nátıjesinde Qyrǵyzstan azamaty bolyp tabylatyn vagonnyń jolserigi ustaldy.
Atalǵan derek boıynsha quqyqqorǵaý organdary habarlandyryldy.
