Reseı azamaty Astanada jan túrshigerlik apat jasady
ASTANA. QazAqparat - Astananyń polıtsııasy jan túrshigerlik apat jasap, oqıǵa ornynan qashyp ketken Reseı azamatyn qolǵa túsirdi, dep habarlaıdy QazAqparat tilshisi.
Kisi ólimimen aıaqtalǵan apat týraly málimet áleýmettik jelide jarııalandy.
«Búgin túnde saǵat 3-4 shamasynda 188 kóshe men Beısekov kósheleriniń qıylysynda kólik apaty oryn aldy. Kýágerlerdiń aıtýynsha, qaza tapqan adam óz kóliginde baǵdarshamnyń qyzyl túsine toqtap turǵan. Sol sátte saǵatyna 160-170 shaqyrym jyldamdyqpen kele jatqan mashına qaza tapqan adamnyń kóligin soǵyp ótken. Oqıǵany kórgen, vıdeoǵa túsirip úlgergen azamattar bolsa, habarlasyńyzdar»,-dep jazdy feısbýk áleýmettik jelisinde Marat Mýs atty azamat.
Al, qalalyq ishki ister departamentiniń baspasóz hatshysy Sofıa Ánýarbekqyzynyń aıtýynsha, apat naqty túngi saǵat 03.30-da oryn alǵan eken.
«Mersedes 190E» markaly kólik Qosshyǵululy-Beısekov kósheleriniń qıylysynda qyzyl túske toqtap turǵan. Sol kezde onyń kóligin «Mersedes 280E» markaly kólik kelip soqqan. 1986 jyly týǵan adam alǵan jaraqattarynan oqıǵa ornynda kóz jumdy. Al, apatqa kináli azamat oqıǵa bolǵan jerden qashyp ketken.
«Jedel izdestirý sharalarynyń arqasynda polıtsııa apatqa kináli Reseı Federatsııasynyń azamatyn qolǵa túsirdi.Tıisti saraptamalar jasalyp jatyr. 36 jastaǵy Reseı azamaty Astana qalasynyń ýaqytsha tergeý ızolıatoryna qamaldy»,- dep habarlady Sofıa Ánýarbekqyzy.
