Reseı azamaty 4 jyl boıy Qazaqstannan zeınetaqy alyp kelgen
ShQO Polıtsııa departamenti baspasóz qyzmetiniń málimetine súıensek, Shemonaıha qalasynda 4 jyl boıy Qazaqstannan zeınetaqy alyp júrgen Reseı Federatsııasynyń azamatshasy anyqtaldy. 63 jastaǵy áıel 2013 jyly Saratov oblysynda RF azamattyǵyn alǵan.
Alaıda Qazaqstanǵa kelgende zańnamany elemeı, QR azamatynyń qujatyn paıdalanyp, zeınetaqy alyp keldi. Qazirgi ýaqytta ol Qazaqstan azamattyǵynan aıyryldy. Oǵan QR ÁQBtK-niń 496-baby boıynsha 100 AEK kóleminde aıyppul salyndy.
«Qos azamattyqpen júrýdiń negizgi sebepteriniń biri – karantındik shekteýler kezinde memlekettik shekarany kedergisiz kesip ótý jáne materıaldyq artyqshylyqtarǵa ıe bolý (zeınetaqy, balalardy týýy kezindegi járdemaqy, joǵary oqý oryndaryna túsý kezinde jeńildik sharttary). Jyl basynan beri 800-den astam adam Qazaqstan azamattyǵynan aıyryldy. Onyń ishindegi negizgileri – Reseı Federatsııasynyń azamattyǵyn qabyldaǵandar», - dedi departament bastyǵy Saǵat Mádıev. ⠀
Sonymen qatar qos azamattyǵy bar 85 adam ákimshilik jaýapkershilikke tartylǵan. Onyń ishinde sheteldik azamattyqty alý faktisi týraly belgilengen merzimde habarlamaǵany úshin – 24, Qazaqstan Respýblıkasynyń pasporty men jeke kýáligin paıdalanǵany úshin – 61 adamǵa aıyppul salyndy.
