Reseı azamattarynyń Qazaqstanǵa kelip-ketýi qalypty deńgeıge oraldy
«Qazaqstan Respýblıkasyna Reseı azamattarynyń kóshi-qony týraly saýaldaryńyzdy qarap, mynany habarlaımyz. Qalyptasqan jaǵdaıdy retteý maqsatynda Úkimet kóshi-qon máseleleri boıynsha tórt keńes ótkizdi, onyń ishinde ekeýi – meniń tóraǵalyǵymmen. Keńes qorytyndysy boıynsha barlyq qajetti sheshimder qabyldanyp, ýákiletti memlekettik organdar men óńirlerdiń ákimdikterine naqty tapsyrmalar berildi», - dep atap ótedi Úkimet basshysy jaýabynda.
Úkimet qabyldaǵan is-sharalardyń nátıjesinde:
Reseı Federatsııasymen shekarada Qazaqstan azamattary úshin turaqty «jasyl dáliz» ashyldy;
ótkizý pýnkterinde shetel azamattarynyń quqyqtary men jaýapkershiligi, kóshi-qon qyzmetine habarlaý, halyqqa qyzmet kórsetý ortalyqtarynyń, «1414» baılanys ortalyǵy jumysynyń tártibi kórsetilgen arnaıy aqparattyq stendter uıymdastyryldy;
óńirlerde tirkelmegen mıgranttardy anyqtaý úshin mobıldi monıtorıngtik toptar quryldy;
jaǵdaıdy turaqsyzdandyrý jáne jalǵan aqparat taratý áreketteri, ásirese áleýmettik jelilerde baqylanyp, toqtatylyp otyr;
elge kelýshiler úshin ýaqytsha turý oryndary uıymdastyryldy, olardyń tirkelýi, ornalasýy jáne turýy úshin qajetti jaǵdaı jasaldy;
jaldamaly turǵyn úı, qonaq úıler men jataqhanalarda turý baǵasyn baqylaý qamtamasyz etildi, kelýshiler úshin de, Qazaqstan Respýblıkasynyń azamattary úshin de jalǵa beriletin turǵyn úı máselesi boıynsha «jedel jeli» telefony ashyldy;
qoǵamdyq tártipti qorǵaý kúsheıtildi jáne bolýy múmkin, onyń ishinde turmystyq jáne ultaralyq qaqtyǵystardyń jáne taǵy basqalarynyń joly kesildi.
«Sondaı-aq Premer-Mınıstrdiń birinshi orynbasary R. Sklıardyń tóraǵalyǵymen Halyqtyń kóshi-qony salasyndaǵy máselelerdi úılestirý jónindegi shtab quryldy. Ulttyq naryqty qorǵaý, memlekettik shekarada jáne shekara mańy óńirlerinde baqylaýdy kúsheıtý, kóshi-qon zańnamasyn saqtaý jónindegi sharalardy, sondaı-aq kelýshilerdi ýaqytsha qonystandyrýǵa jáne beıimdeýge járdemdesýge baǵyttalǵan is-sharalardy kózdeıtin kóshi-qonnyń ósýine baılanysty táýekelderdi basqarý jónindegi is-qımyl jospary ázirlendi. Osy jylǵy qazan aıynda aldyńǵy aımen salystyrǵanda reseılikter 65 paıyzǵa az kelgen jáne kún saıynǵy teris saldo ortasha eseppen 1,6 myń adamdy qurap otyr. Kún saıyn keletin RF azamattarynyń sany memlekettik shekaradan ótýdiń ortasha ádettegi deńgeıine oraldy», - dedi Álıhan Smaıylov.
