Reseı azamaty Qazaqstanda búıregin 50 myń AQSh dollaryna satpaq bolǵan
ASTANA. KAZINFORM — Pavlodarda búıregin zańsyz satpaq bolǵan reseılik sottaldy.
Pavlodar qalasynyń qylmystyq ister jónindegi aýdanaralyq soty tiri adamnyń aǵzasyn zańsyz satýǵa oqtalý deregi boıynsha qylmystyq isti qarady.
Sot materıaldaryna sáıkes, 2024 jyly Reseı Federatsııasynyń azamatshasy paıda tabý maqsatynda Telegram messendjeri arqyly búıregin 50 myń AQSh dollaryna satýǵa kelisim bergen. Aldyn ala kelisim boıynsha operatsııa Pavlodar qalasynda jasalýy tıis bolǵan.
2025 jyly áıel Qazaqstanǵa kelip, medıtsınalyq tekserýden ótken. Sondaı-aq ol 5 mıllıon teńge kóleminde aldyn ala tólem alǵan, osydan keıin polıtsııa qyzmetkerleri tarapynan ustaldy. Qylmys onyń erkinen tys mán-jaılarǵa baılanysty sońyna deıin jetkizilmegen.
— Sot aıyptalýshynyń kinásin moıyndaýyn, ókinish bildirýin jáne asyraýynda jas balalarynyń baryn eskere otyryp, oǵan 10 aı bas bostandyǵynan aıyrý jazasyn taǵaıyndady. Alaıda qamaýda bolǵan ýaqyty jaza merzimine eseptelip, áıel sot zalynan bosatyldy. Úkim zańdy kúshine endi, — delingen habarlamada.
Budan buryn Densaýlyq saqtaý mınıstrligi Kazinform saýalyna joldaǵan jaýabynda aǵza almastyrý tártibin túsindirdi.