Reseı aımaǵyna qazaqstandyq astyqty kirgizýge tyıym salyndy degen aqparat jalǵan - QR AShM
ASTANA. 23 qarasha. QazAqparat - QR Aýyl sharýashylyǵy mınıstrligi Reseı aımaǵyna qazaqstandyq astyqty kirgizýge tyıym salyndy degen aqparattyń shyndyqqa saı kelmeıtinin málimdep otyr.
Bul jaıynda búgin atalǵan vedomstvonyń baspasóz qyzmeti habarlady.
Esterińizge sala keteıik, 2011 jyldyń 18 qarashasynda Qazaqstannyń jáne Reseıdiń aqparattyq taspalarynda Reseı Federatsııasy aımaǵyna qazaqstandyq astyqty kirgizýge tyıym salyndy degen aqparat jaryq kórgen edi.
«Alaıda, Krasnodar aımaǵy boıynsha «Rosselhoznadzordyń» jáne Adygeıa Respýblıkasy boıynsha aýmaqtyq bólimshesiniń aqparatyna súıensek, qazastandyq astyq vagondary elge qaıta jóneltilgen joq»,-delingen taratylǵan málimette. Atap aıtqanda, astyqty eksporttaýshy - «Temirland-San» JShS kompanııasy. Olar bıdaıdy Aqmola oblysynan tıep alǵan.
Qazaqstan Respýblıkasy aýmaǵynan astyqty tıeý kezinde qajetti karantındik saraptama ótkizilgen, onyń qorytyndysy boıynsha munda eshbir karantındik aramshópter anyqtalmaǵan. Munan basqa, sondaı-aq bul astyqtyń saraptamasyn «Baltic control» halyqaralyq ınspektsııalyq kompanııasy da júrgizdi. Olar da eshqandaı karantındik aramshóp tuqymdaryn anyqtaǵan joq.
«Qazaqstan Respýblıkasy Aýyl sharýashylyǵy mınıstrligi Reseı Federatsııasy aımaǵyna qazaqstandyq astyqty kirgizýge tyıym salyndy degen aqparatty shyndyqqa saı emes ekendigin málimdeıdi. Qazaqstandyq astyqty Reseı aýmaǵyna kirgizýine tyıym salý faktileri engizilmegen»,-dep aıtylady baspasóz habarlamasynda.
